बास डी लिडेको उत्कृष्ट अलराउन्ड प्रदर्शनको मद्दतले नेदरल्याण्ड्सले नामिबियालाई ७ विकेटले हराउँदै आइसिसी टी-२० विश्वकप २०२६ मा पुनरागमन जित निकालेको छ।
पाकिस्तानसँगको हारपछि दबाबमा रहेको नेदरल्याण्ड्सका लागि यो जित निकै महत्त्वपूर्ण सावित भयो।
भारतको दिल्लीमा टस जितेर पहिले ब्याटिङ गरेको नामिबियाले ८ विकेटको क्षतिमा १५६ रन बनायो। जान निकोल लोफ्टी-इटनले सर्वाधिक ४२ रन बनाए पनि अन्य ब्याटरहरूले राम्रो सुरुवातलाई ठूलो स्कोरमा बदल्न सकेनन्।
कप्तान स्कट एडवर्ड्सले डी लिडेलाई दुई स्पेलमा बलिङ गराए र दुवै पटक उनले सफलता दिलाए। उनले नामिबियाका सेट भइसकेका ब्याटरहर कप्तान गेरहार्ड इरासमस र जेजे स्मिटलाई आउट गरेर नामिबियाको रनको गतिमा पूर्णविराम लगाइदिए।
लक्ष्य पछ्याउने क्रममा ओपनर माइकल लेभिटले २८ रनको विष्फोटक ब्याटिङ गर्दै नेदरल्याण्ड्सलाई आक्रामक सुरुवात दिलाए। उनले छक्का र चौकाको वर्षा गर्दै टोलीको आत्मविश्वास बढाए।
बलिङमा चम्किएका डी लिडेले ब्याटिङमा उनले कोलिन एकरम्यानसँग ७० रनको साझेदारी गर्दै ७ चौका र ३ छक्काको मद्दतले ७२ रन जोडेर टोलीलाई जितको सँघारमा पुर्याए।
नामिबियाका ब्याटरहरू क्रिजमा जम्न खोज्ने बित्तिकै आउट हुनु र अनावश्यक 'रन आउट' हुनु उनीहरूको हारको मुख्य कारण बन्यो।
-1746009348.jpg)
