टी-२० विश्वकप २०२६ मा आफ्नो पहिलो खेल खेल्नु ठीक अगाडि संयुक्त अरब इमिरेट्स (युएई) ले आफ्ना ब्याटर मोहम्मद जोहेबलाई ‘अनुशासनात्मक कारण’ देखाउँदै घर फर्काएको छ।
यस विषयमा इमिरेट्स क्रिकेट बोर्ड ले सोमबार एक विज्ञप्ति जारी गर्दै भनेको छ, ‘यस बारेमा थप विस्तृत जानकारी पछि उपलब्ध गराइनेछ।’
मंगलबार चेन्नईमा युएईले न्युजिल्यान्डको सामना गर्दैछ। सन् २०२२ पछि युएईको यो पहिलो विश्वकप खेल हो। टोलीका मुख्य ब्याटरमध्ये एक बाहिरिएपछि युएईको ब्याटिङ लाइन-अपमा थप दबाब थपिएको छ। हालै इटालीसँगको वार्म-अप खेलमा युएईको टोली मात्र ८१ रनमा अलआउट भएको थियो।
जोहेबले इटाली विरुद्धको खेलमा ९औं नम्बरमा ब्याटिङ गरेका थिए भने त्यसअघि नेपाल विरुद्धको वार्म-अप खेलमा तेस्रो नम्बरमा आएर २६ बलमा १९ रन बनाएका थिए। युएईले ओपनिङका लागि कप्तान मोहम्मद वसिम र २१ वर्षीय आर्यन शर्माको जोडीलाई पक्का गरिसकेको छ।
सन् २०२५ मे महिनामा डेब्यू गरेका जोहेबले अहिलेसम्म १६ वटा टी-२० अन्तर्राष्ट्रिय खेल खेल्दै २०.२० को औसतमा ३०३ रन बनाएका छन्।
न्युजिल्यान्ड विरुद्धको खेलअघि कप्तान वसिमले टोलीको तयारी र एकताको बारेमा कुरा गरे। युएईको टोलीमा भारतीय र पाकिस्तानी मूलका खेलाडीहरूको मिश्रण भए पनि टिममा राम्रो एकता रहेको उनले बताए। उनले सन् २०२३ मा दुबईमा न्युजिल्यान्डलाई हराएको खेलबाट खेलाडीहरूले आत्मविश्वास लिने पनि बताए।
वसिमले भने, ‘हाम्रो रणनीति एकदमै सरल छ। हामीले यसअघि उनीहरूलाई युएईमा हराएका थियौं, तर यस पटक मैदान, प्रतियोगिता र खेलको अवस्था फरक छ। त्यसैले हामी नयाँ योजनाका साथ आएका छौं। न्युजिल्यान्ड अनुभवी र राम्रो टोली हो, तर हामीले पनि च्याम्पियन टोलीले जस्तै तयारी गरेका छौं। भोलिको खेलमा हामी उत्कृष्ट क्रिकेट खेल्ने प्रयास गर्नेछौं।’
आफ्नो टोलीको एकताको बारेमा बोल्दै उनले थपे, ‘हाम्रो टोलीमा कोही भारतीय वा पाकिस्तानी छैन। हामी सबै युएईका लागि खेलिरहेका छौं र हामी सधैं एकअर्कालाई परिवार जस्तै व्यवहार गर्छौं। हामी परिवार र साथीहरू जस्तै सँगै बस्छौं, सँगै खान्छौं। साँचो भन्नुपर्दा युएईको टोलीमा भारतीय-पाकिस्तानी भन्ने कुनै भेदभाव छैन।’
-1746009348.jpg)
