आइसिसी टी-२० विश्वकप २०२६ को आफ्नो पहिलो खेलमा इंग्ल्यान्डसँग चार रनको झिनो अन्तरले पराजित भएको नेपालले आफ्नो दोस्रो खेल बिहीबार खेल्दैछ।
भारतको मुम्बईस्थित वानखेडे रंगशालामा बिहीबार अपरान्ह सवा तीन बजे नेपालले समूह ‘सी’ को दोस्रो खेल खेल्न लागेको हो।
दोस्रो खेल खेल्न लागे पनि नेपाली क्रिकेट टोलीको चर्चा अहिले इंग्ल्यान्डसँगको खेललाई लिएर छ।
‘तपाईं विश्वकप खेल्नुहुन्छ, त्यहाँ पक्कै पनि दबाब हुन्छ। त्यसको दबाब झेल्न सक्नु पर्छ। सबैजना हामीले देशका लागि राम्रो खेलोस् भन्ने चाहनुहुन्छ। मलाई लाग्छ जसले दबाबपूर्ण परिस्थितिलाई राम्रोसँग सम्हाल्न सक्छ, त्यही टोलीले जित्छ,’ रोहितले मंगलबार वानखेडे रंगशालामा भने, ‘हामीले अहिले धेरै क्रिकेट खेलिसकेका छौँ र हाम्रो टोलीलाई दबाब कसरी झेल्ने भन्ने थाहा छ। हामीले धेरै दर्शकको अगाडि खेलिसकेका छौँ, त्यसैले यस्तो अवस्थालाई कसरी सम्हाल्ने भन्ने हामीलाई थाहा छ र हामी त्यो गर्नेछौँ।’
इंग्ल्यान्डसँगको चार रनको हारपछि नेपालका मध्यम गतिका बलर नन्दन यादवले माफी मागेका थिए। हारका लागि माफी मागेको कुरा धेरै व्यक्तिगत भएको रोहितले बताए। ‘मलाई ठ्याक्कै थाहा छैन उनले किन त्यसो भने, सायद नन्दन त्यो बेला भावुक भएर फ्यान माफी मागेको हुनसक्छ,’ उनले भने।
रोहितले अस्ट्रेलिया, इंग्ल्यान्ड र भारतजस्ता ठूला क्रिकेट टोलीका लागि पनि सन्देश दिए। उनले भने, ‘तपाईंहरू सबैलाई नेपालमा न्यानो स्वागत छ। कीर्तिपुर मैदानमा हामीसँग खेल्न पक्कै पनि मन पर्नेछ र उनीहरूसँग खेल्ने कुरामा धेरै आशावादी छु।’
अस्ट्रेलिया वा भारतजस्ता टोली आएपछि विश्व क्रिकेटलाई नेपालले पनि राम्रो क्रिकेट खेल्छ भन्ने सन्देश दिने उनले बताए। यदि ठूला टोली नेपाल आए नेपाल क्रिकेट अझै अघि बढ्ने र विश्वभर क्रिकेटको विकास गर्न मद्दत पुग्नेछ रोहितको भनाइ छ।
नेपालले यसपटकको विश्वकपका चारै खेल मुम्बईको वानखेडे रंगशालामा खेल्दैछ। रोहितले सबै खेलहरू वानखेडेमा खेल्न पाउनु नेपालका लागि ठूलो फाइदा भएको बताउँदै अघि भने, ‘यहाँको कन्डिसन र विकेटले हाम्रो खेल शैलीलाई सुहाउँछ, त्यसैले हाम्रा लागि एउटा प्लस प्वाइन्ट हो।’
उनले इंग्ल्यान्डविरूद्धको खेलबाट धेरै कुरा सिकेको बताउँदै नेपाली टोलीलाई धेरै आत्मविश्वास दिएको पनि बताए।
‘हामीले विश्वकपको उपाधि दाबेदार टोलीमध्ये एकसँग जसरी खेल्यौँ, त्यसले इटाली विरुद्धको खेलका लागि मनोबल बढाएको छ। तर इटाली पनि एउटा राम्रो टोली हो, त्यसैले हामीले कुनै पनि टोलीलाई हल्का रूपमा लिनु हुँदैन। हामीले बनाएका योजनाहरू मैदानमा उतार्ने यो सही समय हो,’ उनले भने।
इंग्ल्यान्डविरूद्धको पछिल्लो खेलबाट कठिन परिस्थिति (क्रन्च सिचुएसन) मा सही निर्णय लिनु पर्ने पाठ सिकेको पनि बताए। वेष्ट इन्डिज र स्कटल्याण्ड जस्ता टोलीहरूसँग खेल्दा दबाब झेल्नु र योजना सही ढंगले मैदानमा लागू गर्नु नेपालका लागि एकदमै महत्त्वपूर्ण हुने पनि उनको भनाइ छ।
इंग्ल्यान्डविरूद्धको खेलपछि संसारभरबाट प्रशंसा आए पनि पछिल्लो दुई वर्षमा ठूला टोलीसँग खेल खेल्न नपाउनु दुखद पक्ष भएको उनले बताए।
उनले भने, ‘दुई वर्षअघिको विश्वकपमा दक्षिण अफ्रिकासँग एक रनले हारेपछि हामीले वेष्ट इन्डिजसँग एउटा सिरिज मात्र खेल्यौँ। हामीले जस्तो एक्सपोजर र अनुभवको अपेक्षा गरेका थियौँ, त्यो पाउन सकेनौँ। राम्रा टोलीहरूसँग खेल्दै आफ्ना क्षमता परीक्षण गर्नु हाम्रा लागि धेरै महत्त्वपूर्ण छ। हामीले वर्षमा ६–७ वटा नभए पनि ठूला टोलीसँग कम्तीमा एक वा दुईवटा सिरिज नियमित खेल्न पायौँ भने त्यसले हामीलाई धेरै मद्दत गर्नेछ।’
ओमानमा भएको विश्वकपपछि नेपाली टोलीले कुनै टोलीसँग अन्तर्राष्ट्रिय खेल खेलेको थिएन। यद्यपी कीर्तिपुरस्थित त्रिवि मैदानमा एक महिना लामो नेपाल प्रिमियर लिग भने भएको थियो। लिगले नेपाली खेलाडीलाई फाइदा पुगेको उनको भनाइ छ।
‘नेपाली खेलाडीका लागि एनपिएल धेरै महत्त्वपूर्ण थियो। यसले गर्दा हाम्रा लोकल खेलाडीले पनि विश्वका उत्कृष्ट खेलाडीहरूसँग खेल्ने र ड्रेसिङ रुम सेयर गर्ने अवसर पाएका छन्। यसले खेलाडीहरूलाई एक्सपोजर र अनुभव दिलाउन धेरै मद्दत गरेको गर्यो,’ रोहितले लिगको फाइदाबारे भने।
गत वर्षको दक्षिण अफ्रिकाविरुद्धको खेल र यसपटकइंग्ल्यान्ड विरुद्धको खेलले नेपाललाई धेरै चर्चामा ल्याएको छ। डेल स्टेनजस्ता दिग्गजले पनि नेपालको प्रतिभाको बारेमा चर्चा गरेको बताएका रोहितले भविष्यमा पनि यस्तै प्रदर्शन जारी राख्ने आशा गरे।
नेपालको इंग्ल्यान्डविरूद्धको प्रदर्शनपछि आइपिएल टोलीले सामाजिक सञ्जालमार्फत् प्रशंसा गरेका थिए। अब आइपिएल टोलीले पनि नेपाली खेलाडीलाई खेलाउनेमा आफू आशावादी भएको रोहितले बताए। उनले भने, ‘प्रतिभा र अवसर हामीसँग प्रतिभाको कमी छैन र जसरी हामीले प्रशंसा पाइरहेका छौँ, मलाई आशा छ कि हाम्रा केही खेलाडीहरू आगामी दिनमा आइपिएलका लागि छानिनेछन्।’
-1746009348.jpg)
