आईसीसी यू-१९ पुरुष क्रिकेट विश्वकप २०२६ को 'सुपर ६' चरणमा पाकिस्तानलाई ५८ रनले पराजित गर्दै भारत सेमिफाइनलमा प्रवेश गरेको छ।
यो जितसँगै पाँच पटकको विजेता भारत समूह २ मा ८ अंकसहित इङ्गल्यान्ड बराबर भएको छ। योसँगै दुवै टोलीले अन्तिम चारमा आफ्नो स्थान सुरक्षित गरेका छन्।
बुलावायोको क्विन्स स्पोर्ट्स क्लबमा टस हारेर पहिले ब्याटिङ गरेको भारतले वेदान्त त्रिवेदीको धैर्यपूर्ण ६८ रन र तल्लो क्रमका ब्याट्सम्यानहरूको योगदानको मद्दतले २५२ रन बनाएको थियो।
जवाफी ब्याटिङमा पाकिस्तानका उस्मान खानले ६६ रन बनाउँदै टोलीलाई जिततर्फ डोहोर्याउने प्रयास गरे पनि भारतीय बलर आयुष म्हात्रे बाधक बने। उनले २१ रन दिएर ३ महत्त्वपूर्ण विकेट लिँदै खेललाई भारतको पक्षमा मोडे। त्यसपछि खिलान पटेलले ३ विकेट लिँदै पाकिस्तानको इनिङ्स समाप्त पारे।
भारतको सुरुवात राम्रो रह्यो। ओपनर आरोन जर्ज (१६) र वैभव सूर्यवंशी (३०) ले पहिलो विकेटका लागि ४७ रन जोडे। तर, मोहम्मद सैयाम र अब्दुल सुभानले लगातार विकेट लिएपछि भारतको माथिल्लो क्रम केही धर्मराएको थियो। त्यसपछि वेदान्त त्रिवेदी र विहान मल्होत्राले ६२ रनको साझेदारी गर्दै इनिङ्स सम्हाले। त्रिवेदीले अन्य ब्याट्सम्यानहरूसँग मिलेर साना तर महत्त्वपूर्ण साझेदारीहरू गरे। अन्त्यमा कनिष्क चौहानले २९ बलमा ३५ रन र पटेलले १५ बलमा २१ रन जोडेपछि भारत २५२ रनमा पुग्यो।
लक्ष्य पछ्याउने क्रममा पाकिस्तान एक समय १५१ रनमा मात्र २ विकेट गुमाएको बलियो स्थितिमा थियो। ओपनर हम्जा जहुर (४२), उस्मान खान (६६) र कप्तान फरहान युसुफ (३८) ले राम्रो खेलिरहेका थिए। तर, कप्तान युसुफ आउट भएलगत्तै पाकिस्तानको ब्याटिङ ध्वस्त भयो। पाकिस्तानले आफ्ना अन्तिम ८ विकेट मात्र ४३ रन जोड्दा गुमायो।
-1746009348.jpg)
