अमेरिकी राष्ट्रपति डोनाल्ड ट्रम्प र युक्रेनका राष्ट्रपति भोलोदिमिर जेलेन्स्कीबीच भेटवार्ता भएको छ।
इटालीको राजधानी रोममा शनिबार ट्रम्प र जेलेन्स्कीबीच भेटवार्ता भएको हो। उनीहरूले १५ मिनेट वान टु वान भेटवार्ता गरेको अन्तर्राष्ट्रिय सञ्चारमाध्यमहरूले जनाएका छन्।
ट्रम्प र जेलेन्स्की दुवै जना क्याथोलिक चर्चका प्रमुख पोप फ्रान्सिसको अन्त्येष्टिमा सहभागी हुन रोम पुगेका थिए। त्यही मौकामा दुई जनाले छोटो कुराकानी गरेका हुन्।
जेलेन्स्कीले भेट सकारात्मक भएको बताएका छन्।
'हामीले धेरै विषयमा छलफल गर्यौं। हाम्रा जनताका जीवन रक्षा, पूर्ण र विनाशर्त युद्धविराम र दिगो शान्तिका बारेमा कुरा भयो,' उनले टेलिग्राममा लेखेका छन्।
ह्वाइट हाउसले पनि छलफल सकारात्मक भएको बताएको छ।
ट्रम्पले रूस र युक्रेनबीच युद्ध अन्त्य गरी शान्ति स्थापना गर्नका लागि मध्यस्थता गर्दै आएका छन्।
युद्धविरामका लागि छलफल गरिरहँदा रूसले किभमा आक्रमण गरेपछि ट्रम्पले रूसी राष्ट्रपति भ्लादिमिर पुटिनको आलोचना गरेका थिए।
त्यसअघि रूस हालको नियन्त्रण रेखामा सहमत भएर युद्धविराम गर्न तयार भएको बताउँदा जेलेन्ल्स्कीले क्राइमियालाई मान्यता दिन नसकिने भनेपछि ट्रम्प जेलेन्स्कीविरूद्ध खनिएका थिए
शनिबारको भेटमा दुई राष्ट्रपतिबीच भएको कुराकानीको विस्तृत विवरण भने सार्वजनिक भइसकेको छैन। भेटवार्ता अघि फ्रान्सका राष्ट्रपति इमानुअल म्याक्रों र बेलायतका प्रधानमन्त्री कियर स्टार्मरले पनि ट्रम्पसँग भलाकुसारी गरेका थिए।
ट्रम्प र जेलेन्स्कीबीच दुई महिनापछि प्रत्यक्ष भेटवार्ता भएको हो।
फेब्रुअरीको अन्तिम साता ट्रम्प र जेलेन्स्कीबीच ह्वाइट हाउसमा भेटवार्ता भएको थियो।
त्यतिबेला खनिज सम्झौताका लागि भनेर जेलेन्स्की ह्वाइट हाउस पुगेका थिए। सौहार्दपूर्ण ढंगले अघि बढिरहेको वार्तामा ट्रम्पका उपराष्ट्रपति जेडी भान्सले हस्तक्षेप गरेपछि तीन जनाबीच चर्काचर्की भएको थियो।
त्यसपछि खनिज सम्झौता नै भाँडिएको थियो। पछि जेलेन्स्कीले पुनः भेटवार्ता गरी सम्झौताका लागि तयार रहेको बताए पनि ट्रम्पले उनलाई फेरि बोलाएनन्।
त्यसयता दुई राष्ट्रपतिबीच प्रत्यक्ष रूपमा भेटवार्ता भएको थिएन।
