गर्मीमा जंगल यात्रा गर्नेहरू कमै हुन्छन्। काठमाडौं झोछेँको यो जंगलमा भने गर्मी जति बढ्छ, मान्छेको भिड उति बढ्दै जान्छ।
हामी कुरा गर्दैछौं, 'जुस जंगल' को।
करिब तीन वर्षअघि खुलेको यो पसल झोछेँमा बढी चहलपहल हुने ठाउँमध्ये पर्छ। घरैपिच्छे खुलेका रेस्टुरेन्ट र क्याफेहरूको भिडमा यसले अलग पहिचान बोकेको छ। खासगरी झोछेँ घुम्न आउने युवाहरू ताजा फलफूलको रस पिउन यहाँ आउँछन्। बिहान र साँझ बढी भिड लाग्छ। शनिबार र अरू सार्वजनिक विदाको दिन दिउँसै पनि भिड लागिरहन्छ।
यहाँ प्राय: तीन जना काम गरिरहेका देखिन्छन्। तीमध्ये २० वर्षीय राजा जयसवाल मुख्य हुन् भने दुई जना सहयोगी भाइहरू छन्। पसलका सञ्चालक भने कहिलेकाहीँ मात्र आउने राजा बताउँछन्।
राजाको विशेषता के भने, उनी यहाँ आउने ग्राहकसँग एकदमै हार्दिकताका साथ प्रस्तुत हुन्छन्। नियमित आउने ग्राहकलाई त राम्ररी चिन्छन्।
उनका अनुसार यहाँ ८० प्रतिशत ग्राहक नियमित आउँछन्। उनीहरू कुन फलफूलको रस खान रूचाउँछन्, कसरी खान रूचाउँछन् र कुन माध्यमबाट पैसा तिर्छन् भन्नेसम्म उनलाई कन्ठ छ।
राजाले यही पसलमा काम गर्दै फलफूल काट्न र त्यसबाट रस निकाल्न सिकेका हुन्। यहाँ फ्रेस जुस, लस्सी, बबल टी, नरिवल पानी, मिल्क सेक, आइसक्रिम लगायत पाइन्छन्। सबभन्दा बढी बिक्ने फ्रेस जुस हो।
'हामी सबै किसिमका फलफूलको जुस बेच्छौं,' राजाले भने, 'गनेरै भन्नुपर्दा १६ थरीका फलफूलको जुस पाइन्छ। विभिन्न फलफूललाई एकै ठाउँ मिसाएर मिक्स जुस पनि बनाउँछौं।'
उनका अनुसार नियमित आउने ग्राहकले हरेक दिन फरक फरक फलफूलको रस खाने गर्छन्। बढी बिक्नेमा नरिवल पानी र खरबुजाको रस पर्छ। धेरैले रस मात्र पिउँछन् भने कतिपयले रस निकाल्दा बचेका छोक्रा पनि मिसाउन लगाउँछन्। रससँगै छोक्रा मिसाउनु स्वास्थ्य दृष्टिले फाइदाजनक हुन्छ। फलफूलको छोक्रा फालेर रस मात्र पिउँदा हाम्रो शरीरले फाइबर पाउँदैन।
फलफूलको रस पिउनेमा ३० देखि ५० वर्ष उमेरका व्यक्ति बढी भएको उनको अनुभव छ। युवा र केटाकेटी मिल्क सेक, बोबा, आइसक्रिम बढी खान्छन्।
पछिल्लो समय वसन्तपुर डबलीदेखि झोछेँसम्म बोबा पसल धेरै छन्। बोबा मात्र बेच्ने पसल पनि थुप्रै खुलेका छन्। त्यसैले राजाको पसलमा बोबाको व्यापार खासै धेरै हुँदैन। मिल्क सेक र आइसक्रिम भने खुब बिक्छ।
तपाईंहरू आफूलाई चाहिने फलफूल कहाँबाट ल्याउनुहुन्छ त?
यो प्रश्नमा राजाले भने, 'हामी सबै फलफूल बल्खुबाट ल्याउँछौं। ग्राहकहरू धेरै आउने भएकाले हरेक दुई दिनमा फलफूल लिन जानुपर्छ। त्योभन्दा बढीको स्टक हामी राख्दैनौं।'
यहाँ रस बनाउँदा चिनी प्रयोग गरिँदैन। रसमा मिठास भर्ने अन्य मसला पनि उनीहरू हाल्दैनन्। ग्राहकले मागेको खण्डमा नुन भने हाल्दिने गर्छन्।
यहाँ फरक फरक फलफूलको रस निकाल्न फरक फरक तरिका अपनाइन्छ। सुन्तलाको रस हातैले निकाल्छन् भने स्याउको रस निकाल्न मिक्सर प्रयोग गर्छन्। मिक्सरको सरसफाइमा पनि विशेष ध्यान दिइन्छ।
अरू जुस पसलको दाँजोमा सफा भएको र फलफूलको रस निकाल्दा सरसफाइमा ध्यान दिएकाले ग्राहकहरू आकर्षित भएका हुन् कि भन्ने राजालाई लाग्छ।
यहाँ पाइने फलफूलको रस प्रतिगिलास १५० देखि २०० रूपैयाँसम्म पर्छ। हरेक दिन २० देखि २५ हजारसम्मको व्यापार हुने उनले जानकारी दिए। पानी परेको दिन भने व्यापार स्वाँट्टै घट्छ। त्यस्तो बेला दिनको १० देखि १५ हजार रूपैयाँभन्दा बढी व्यापार नहुने उनी बताउँछन्।
उनको पसलमा डेलिभरीको सुविधा पनि छ। त्यो सुविधा टाढा टाढाका ग्राहकका लागि होइन। झोछेँ वरपरकै ग्राहकले मात्र अर्डर गर्न सक्छन्। खासगरी वरपरका पसलबाट यस्तो अर्डर आउने उनको भनाइ छ।
प्याकेजिङमा पाइने विभिन्न कम्पनीका जुसले तपाईंहरूको व्यापारमा कस्तो असर पारेको छ? मैले यो प्रश्न पनि राजासँग सोधेकी थिएँ।
जबाफमा उनले भने, 'मेरो विचारमा अचेल मान्छेहरू आफ्नो स्वास्थ्यप्रति सजग भइसकेका छन्। त्यसैले प्याकेटको जुसभन्दा ताजा फलफूलको रस नै खान रूचाउँछन्। कति जना जुसका पारखी त टाढा टाढादेखि हाम्रो पसल खोज्दै आउँछन्। उहाँहरू मैले बनाएको जुस एकदमै राम्रो मान्नुहुन्छ। ग्राहकको मुखबाट सकारात्मक प्रतिक्रिया सुन्दा खुसी लाग्छ।'
राजा र उनका सहयोगी भाइहरू बिहान ८ देखि राति १० बजेसम्म पसलमा काम गर्छन्। बिहान ग्राहक आउनुभन्दा अगाडि नै फलफूल काट्न थाल्छन्।
ग्राहक नआउँदै के हिसाबले फलफूल काट्ने त?
मेरो यो प्रश्नमा राजाले भने, 'हामीलाई हरेक दिन मोटामोटी कति ग्राहक आउँछन् भन्ने अनुमान हुन्छ। घाम लागेको दिन धेरै जना आउँछन् भने पानी परेको दिन वा चिसो मौसममा कम आउँछन्। त्यसैले दिनको सुरूआत हेरेर हामी आजलाई कति फलफूल काट्नुपर्ला भन्ने अनुमान गर्छौं।'
प्राय: उनको अनुमान फेल खाएको छैन।
राति ९ बजेपछि ग्राहकको भिड पातलो भइसकेको हुन्छ। त्यसपछि उनीहरू पूरा पसल सरसफाइ गर्छन्। पसल सफा गर्न एक घन्टा जति लाग्छ।
'राम्ररी सफा गरेन भने झिँगा भन्किने वा गनाउने समस्या हुन्छ,' उनले भने, 'एकदिन मात्र सफा गरेनौं भने पनि झिँगा भन्किन थालिहाल्छ। हल्का गन्ध पनि आउँछ। त्यसैले सफासुग्घर नगरी कहिल्यै पसल बन्द गर्दैनौं।'
उनको पसलमा फलफूलका फोहोर धेरै थुप्रिन्छन्। त्यसलाई दिनभरि पसलमै राख्दा गन्ध आउने समस्या हुन्छ। त्यसैले दिनकै तीनचोटि फोहोर उठाउने मान्छे आउँछन्। यसले पनि पसल सफा राख्न मद्दत गरेको राजा बताउँछन्।
'मलाई यहाँ काम गर्दा गर्दा यो व्यवसायबारे धेरै ज्ञान भइसक्यो। ग्राहकको रूचि पनि बुझिसकेँ,' राजाले भने, 'भविष्यमा आफ्नै पसल खोल्न मन छ।'
***
-1742801159.jpg)
