सत्तारूढ नेपाली कांग्रेसका महामन्त्री विश्वप्रकाश शर्माले सरकारको काम गर्ने क्षमता दोब्बर बनाउन आग्रह गरेका छन्।
प्रधानमन्त्री केपी शर्मा ओलीलाई लक्ष्य गर्दै महामन्त्री शर्माले सडकको प्रदर्शन छाडेर सरकारको काम गर्ने क्षमतामा वृद्धि गर्न सुझाव दिएका हुन्।
कांग्रेस बाँकेले नेपालगञ्जमा शनिबार गरेको जिल्ला सम्मेलनमा बोल्दै महामन्त्री शर्माले सडकमा राजनीतिक दल लगायतले प्रदर्शन गर्नु स्वाभाविक हुने भए पनि प्रधानमन्त्री नै सडक प्रदर्शनमा उत्रनु उचित नहुने बताए।
‘प्रधानमन्त्रीले सडकको प्रदर्शनमा होइन, सरकारको प्रदर्शनमा ध्यानकेन्द्रित गर्न जरूरी छ। प्रधानमन्त्रीज्यूको समय शिक्षक आन्दोलनको हल खोज्न केन्द्रित हुनुपर्थ्यो तर प्रधानमन्त्रीज्यू त्यतातिर होइन सडकतिर लाग्नु भो,’ महामन्त्री शर्माले भने, ‘सार्वजनिक अपिल छ- प्रधानमन्त्रीज्यू सरकारको गति बढाउन र सरकारको प्रदर्शन सुधार्नतर्फ लाग्नुस् l सडक प्रदर्शन हामी दलहरूले गरौंला, प्रधानमन्त्रीज्यूले सरकारको काम गर्ने क्षमताको दोब्बर प्रदर्शन बढाउनुस्। तब गणतन्त्रप्रति जनताको समर्थन दोब्बर बढ्नेछl’
राजनीतिक दलहरूले सडकमा प्रदर्शन गर्ने र प्रदर्शनमार्फत् आफ्नो एजेन्डा उपर जनमत बनाउन पहल गर्ने कार्य लोकतन्त्रमा स्वाभाविक हुने पनि उनले बताए।
‘केहिअघि माओवादी र एकीकृत समाजवादी पार्टीको प्रदर्शन र पछिल्लो समय एमाले पार्टीको प्रदर्शनलाई स्वभाविक रूपमा लिनुपर्छ l लोकतान्त्रिक गणतन्त्रको पक्षमा दृढ रूपले प्रस्तुत यी प्रदर्सन अत्यन्तै सकारात्मक छन्,’ उनले भने।
