दसौं राष्ट्रिय खेलकुदका लागि सुदूरपश्चिममा खेलाडी छनौटका लागि भोलिदेखि खेल सञ्चालन हुँदैछन्। आइतबार अपराह्न साढे चार बजे परराष्ट्रमन्त्री आरजु राणाले छनोट प्रतियोगिताको उद्घाटन गरेकी छन्।
उद्घाटनअघि नौ वटै जिल्लाका खेलाडी, विभिन्न समुदायका समाज, नेपाली सेना, नेपाल प्रहरी, सशस्त्र प्रहरी र विद्यार्थीहरूले संयुक्त रूपमा सजावट गरिएको धनगढी रंगशालाको मैदानमा मार्चपास गरेका थिए।
उद्घाटन समारोहमा सुदूरपश्चिम प्रदेश सरकारका सामाजिक विकासमन्त्री मेघराज खड्का, राज्यमन्त्री सरस्वती खड्का, आन्तरिक मामिला तथा कानुनी मन्त्री हीरा सार्की लगायत विभिन्न क्षेत्रको प्रतिनिधित्व गर्ने अतिथिहरूको सहभागिता थियो।
उद्घाटन समारोह कार्यक्रममा सम्बोधन गर्दै सुदूरपश्चिमकी सामाजिक विकास राज्यमन्त्री सरस्वती खड्काले निष्पक्ष ढंगबाट खेलाडी छनोट हुनुपर्नेमा जोड दिइन्।
'छनोट प्रतियोगितामा खेलाडी छनोटको काम सही र निष्पक्ष ढंगबाट होस्, सुदूरपश्चिमले बढीभन्दा बढी मेडल जितोस्। राम्रो खेलाडीको साथमा हामी सधैं साथमा छौं। तपाईंहरू मन लगाएर खेल्नुहोस्,' उनले भनिन्।
यस्तै, सामाजिक विकासमन्त्री मेघराज खड्काले खेलकुदमा सुदूरपश्चिमले आफ्नो अलग्गै पहिचान बनाउने काम गरेको बताए। अझै राष्ट्रिय तथा अन्तर्राष्ट्रिय स्तरमा सुदूरपश्चिमले राम्रो गर्न सदैव प्रदेश सरकारले साथ दिने उनको भनाइ थियो।
'सुदूरपश्चिमका खेलाडीले धेरैभन्दा धेरै मेडल ल्याउने आशा छ। हामी अझै अगाडि बढ्नेछौं। दसौं राष्ट्रिय खेलकुदका लागि सबै खेलाडीलाई शुभकामना छ,' उनले भने।
कार्यक्रममा हालै भारतमा सम्पन्न प्रथम खो–खो विश्वकपमा नेपालबाट उपविजेता बन्न सुदूरपश्चिमबाट प्रतिनिधित्व जनाउने खेलाडी र टिम व्यवस्थापकलाई नगदसहित सम्मान गरिएको थियो। प्रदेश खेलकुद परिषदले चार जना खेलाडी र एक जना टिम व्यवस्थापकलाई नगद पचास हजारसहित सम्मानपत्र दिएर सम्मान गरेको हो।
धनगढी–१३ की खुसी राना, धनगढी–१४ की वर्षा पण्डित, कञ्चनपुरको कृष्णपुर नगरपालिका–९ का जोगेन्द्र राना, कैलालीको टिकापुर नगरपालिका–८ का गणेश विक र धनगढी–४ का टिम व्यवस्थापक कृष्ण पनेरूलाई सम्मान गरिएको हो।
देशको नाम विश्वसामु चिनाउने खेलाडीलाई सम्मान गर्न पाउँदा खुसी लागेको सुदूरपश्चिम खेलकुद परिषदका सदस्य सचिव दीपक सिंहको भनाइ छ।
यस्तै, कबड्डीका अन्तर्राष्ट्रिय दुई जना खेलाडीलाई पनि सम्मान गरिएको छ। राष्ट्रिय तथा अन्तर्राष्ट्रिय रूपमा खेलकुद क्षेत्रमा महत्वपूर्ण योगदान पुर्याएको भन्दै कैलालीको लम्कीचुहा नगरपालिका–२ बगौराका हरिस खत्री र गौरीगंगा नगरपालिका–५ का रामु टमटालाई नगदसहित सम्मान गरिएको हो। उद्घाटन समारोहमा कबड्डी संघले उक्त सम्मान कार्यक्रम आयोजना गरेको थियो।
सुदूरपश्चिम खेलकुद परिषदले कञ्चनपुर जिल्ला खेलकुद विकास समितिका अध्यक्ष कुवेर खड्कालाई पनि उत्कृष्ट कामको मूल्यांकन गर्दै सम्मान गरेको थियो। यस्तै, बझाङ जिल्ला खेलकुद विकास समितिका अध्यक्ष पुष्पलाल रोकाया ज्वालालाई पनि सोही कार्यक्रममा सम्मान गरिएको थियो।
छनोट खेल सञ्चालनका लागि धनगढीको रंगशाला र महेन्द्रनगरको रंगशाला सजिएका छन्। भोलिदेखि खेलाडी छनोटको खेल सञ्चालन हुनेछ। दसौं राष्ट्रिय खेलकुद प्रतियोगितामा सुदूरपश्चिमबाट ७७८ जना खेलाडी सहभागी हुँदै छन्। यस्तै, ४५० जना निर्णायकहरू पनि सहभागी जनाउने छन्।
सुदूरपश्चिमको छनोटमा भने प्रदेशका २८०० खेलाडी सहभागी हुँदै छन्। छनोट खेल खेल्न खेलाडीहरू उत्साहित हुँदै धनगढी पुगिसकेका छन्, भोलिदेखि खेल खेल्नेछन्। सुदूरपश्चिम प्रदेशले दसौं राष्ट्रिय खेलकुदमा ६१ विधाका खेलमा सहभागी जनाउनेछ। त्यसैका लागि प्रदेश छनोट प्रतियोगितामा महिला र पुरूष गरी ३१ खेल हुने सुदूरपश्चिम खेलकुद परिषदका सदस्य सचिव सिंहले जानकारी दिए।
छनोट खेल फागुन २ गतेसम्म सञ्चालन हुनेछ।
कैलालीको धनगढीमा फुटबल, भलिबल, एथलेटिक्स, क्रिकेट, बास्केटबल, ब्याडमिन्टन, टेबल टेनिस, बुद्धिचाल, खो–खो, उसु लगायतका खेल हुनेछन्। यस्तै, कञ्चनपुरको महेन्द्रनगरमा कबड्डी, तेक्वान्दो, कराते, कुश्तीका खेल हुनेछन्।
छनोट प्रतियोगितामा अछामबाट १४१, बझाङबाट २६३, बैतडीबाट २०२, डोटीबाट २९४, बाजुराबाट २३९, दार्चुलाबाट २३६, डडेल्धुराबाट २४३, कैलालीबाट ४३१ र कञ्चनपुरबाट ४२३ जना खेलाडी गरी २४६३ जना प्रतियोगितामा भाग लिनेछन्। ३१ मध्ये १६ वटा खेलको प्रतियोगिता हुने छ।
छनोट हुने खेलमा बास्केटबल महिला, कुस्ती, आइटिएफ तेक्वान्दो, सुटिङ, जुडो, रग्बी, भारोत्तोलन, ह्यान्डबल छन्। हक्की, आर्चरी, साइकलिङ, साफ्ट टेनिस, पौडी, शारीरिक सुगठन, सेपाक ताक्क्रो, फेन्सिङ, लन टेनिस, जिम्नास्टिक गरी १० वटा खेलका खेलाडीले सहजै दसौं राष्ट्रिय खेलकुदमा सहभागी जनाउने छन्।
सुदूरपश्चिमलाई राष्ट्रियस्तरमा बलियो रूपमा सावित गर्न मेहनत गरिरहेको सदस्य सचिव सिंहको भनाइ छ।
