नेकपा एमाले अध्यक्ष केपी शर्मा ओलीलाई आफ्नो समूह मिलाउन निकै सकस परिरहेको छ। मौजुदा १८ जना पदाधिकारीमध्ये अधिकांश ओली पक्षमा खुलेका छन्। वरिष्ठ उपाध्यक्ष ईश्वर पोखरेलले ओलीलाई चुनौती दिने बताइरहँदा उनको पक्षमा खुल्ने ६ जना छन्।
ओलीलाई अहिले बहालवाला पदाधिकारीहरूलाई समूहमै समेट्नुपर्ने चुनौती छँदैछ, नयाँलाई जिम्मेवारी दिनुपर्ने चुनौती पनि थपिएको छ।
ओली पक्षका एक नेताले दिएको जानकारी अनुसार आज शुक्रबार बस्ने सचिवालय बैठकमा पदाधिकारी संख्या बढाउने प्रस्ताव जाँदैछ। ओलीले उपाध्यक्ष संख्या बढाएर ५ र सचिव संख्या ९ पुर्याउने तयारी गरेका छन्।
पदाधिकारी बढाउने बहस भइरहँदा पनि ओलीलाई सबभन्दा पेचिलो महासचिवको उम्मेदवार छनोटमा परेको छ।
ओली समूहबाट महासचिवका तीन जना आकांक्षी छन्। शंकर पोखरेलले महासचिव नै दोहोरिन चाहेका छन्। उपमहासचिवद्वय पृथ्वीसुब्बा गुरूङ र प्रदीप ज्ञवालीको पनि महासचिव बन्न आकांक्षा छ। यी तीनै जना नेताले मुख फोरेरै ओलीसामू आफ्नो आकांक्षा राखिसकेका छन्। तर ओलीको चाहना मुखर रूपमा प्रकट भइसकेको छैन।
उनले कसैलाई पनि वचन दिएका छैनन्। तर निकट नेताहरूलाई सम्भावित समूहको छनक दिएका छन्।
एक नेताका अनुसार महासचिव उम्मेदवारका रूपमा ओलीको पहिलो रोजाइ महासचिव शंकर पोखरेल नै छन्। संगठन निर्माणमा भिजेका र कार्यकर्ताको आधारभूत तहसम्मै पुगेका हिसाबले पनि उनीमार्फत् आफ्नो योजना लागू गर्न ओलीले सहज ठानेका छन्।
पार्टीको नीति, कार्यक्रमिक सिद्धान्त, संगठनात्मक ढाँचाबारे व्याख्याता मात्र नभई अध्यक्षको प्रतिरक्षा पनि गर्ने हिसाबले स्वाभाविक रूपमा उनी अध्यक्षको रोजाइमा परेको संस्थापन पक्षको बुझाइ छ।
तर शंकर पोखरेलको कार्यशैलीका कारण समूहभित्रै असन्तुष्टि पनि बढेको छ। पोखरेलको कार्यशैली, गुटगत व्यवहारका कारण उपाध्यक्ष विष्णु पौडेल र पृथ्वीसुब्बा गुरूङ उनीसँग रूष्ट छन्। उनी महासचिवको उम्मेदवार बने दुवै जनाले असहयोग गर्न सक्ने जोखिम पनि छ।
पोखरेलपछि ओलीले प्रदीप ज्ञवालीलाई राखेका छन्।
ज्ञवाली अहिले पार्टी स्कुल विभाग प्रमुख छन्। स्कुल विभागमार्फत् दसौं महाधिवेशनयता ६८ जिल्ला पुगेर नेता–कार्यकर्तालाई प्रशिक्षित गर्ने मात्र होइन, प्रशिक्षकहरू पनि उत्पादन गरेका छन्। यसरी प्रशिक्षित गरेका कार्यकर्ताको संख्या नै ७ हजार ७८३ जना पुगेको छ।
उनले एमालेको राजनीतिक दस्तावेज लेखनमा पनि सरकारमा हुँदा नै सैद्धान्तिक तथा नीतिगत काममा अध्यक्ष ओलीलाई सघाएका थिए। त्यही भएर पनि उनले राजनीतिक तथा वैचारिक हिसाबले आफूलाई प्रतिस्पर्धीका रूपमा उभ्याउँदै लगेका छन्।
ज्ञवाली खास विषयमा आलोचनात्मक दृष्टिकोण पनि राख्छन्। २०७७ पुस ५ को प्रतिनिधिसभा विघटन बेला आलोचनात्मक समर्थन गरेका कारण ओली उनीसँग केही समय रूष्ट भएका थिए। यस्तै कारण अोलीले उनलाई जिम्मेवारी दिन हिच्किचाउने हुन् कि भन्ने पनि केही नेतालाई लागेको छ।
ओलीनिकट नेताका अनुसार ओलीले ज्ञवालीलाई उपमहासचिव नै दोहोर्याउने र महासचिवमा पोखरेललाई अघि सार्ने प्रबल सम्भावना छ।
ज्ञवालीले भने उपाध्यक्ष र उपमहासचिव बन्दिनँ भनेर ओलीलाई भनिसकेको उनी निकट नेता बताउँछन्। उनले अध्यक्ष ओलीसामू महासचिव बन्ने आकांक्षा राखिसकेका छन्।
'उहाँले उपमहासचिव कुनै हालतमा दोहोरिन्न र उपाध्यक्ष पनि बन्दिनँ भन्नुभएको छ,' उनीनिकट एक नेताले भने।
उता पृथ्वीसुब्बा गुरूङ आदिवासी जनजाति समुदायबाट उठेका नेता हुन्। उनी संघीयताबारे पार्टीभित्र खरो र दह्रो विचार र अडान प्रस्तुत गर्ने नेता हुन्।
पछिल्लो समय उनले अध्ययनको दायरा बढाएका छन्। राजकाज, राजनीतिक–वैचारिक र संगठनात्मक कार्य क्षमतासमेत बढाएका गुरूङ अभिव्यक्तिका कारण भने विवादमा आइरहन्छन्। पछिल्लो पटक सरकारमा हुँदा पनि उनका केही बोली विवादमा परेका थिए।
गुरूङले अध्यक्ष ओलीसामू महासचिवको आकांक्षा राखे पनि ओलीको चाहना उनलाई अन्तै सेट गर्ने रहेको उनीनिकट नेता बताउँछन्।
गुरूङलाई उपाध्यक्ष सेट गर्नेबारे ओली करिब करिब निष्कर्षमा पुगिसकेको स्रोत बताउँछ।
'उहाँ यसपटक उपाध्यक्ष बन्नुहुन्छ। अध्यक्षज्यूको त्यही निष्कर्ष बुझेका छौं,' ओलीनिकट एक नेताले भने।
उपाध्यक्ष विष्णु पौडेलले अध्यक्ष र महासचिवबाहेक प्रतिस्पर्धा गर्छु भनेर सार्वजनिक रूपमै भनिसकेका छन्। गुरूङलाई महासचिव बनाउन नमान्ने हो भने प्रतिनिधि चयनअघि ओली पक्षमा खुलेका ७ जना पदाधिकारीको जोड ज्ञवालीलाई नै महासचिव बनाउनु हुनेछ।
उनीहरूले आफ्नो समूहमा यसबारे कुराकानी गरिसकेका छन्। ज्ञवालीलाई महासचिव बनाउन जोड दिनेमा उपाध्यक्ष पौडेल, उपमहासचिव गुरूङ, सचिव पद्मा अर्याल लगायत छन्।
वरिष्ठ उपाध्यक्ष ईश्वर पोखरेल समूहले पनि अध्यक्ष ओलीको टिम निर्माण हेरिरहेको छ। आफ्नो समूहमा असन्तुष्टि नबढोस्, अरूलाई टिम बनाउन जिम्मा दिँदा भद्रगोल नहोस् भनेर सूची बनाउने जिम्मा आफूले लिएका छन्।
'पूर्वका कार्यकर्ताले पश्चिमका नेता कसरी चुन्न सक्छन्? कार्यकर्ताले नेता कसरी चिन्न सक्छन्? नेतृत्वले सबै नेता चिनेको हुन्छ, उसको योग्यता र क्षमता परख गरेको हुन्छ। त्यसैले यसपटक म सूची बनाउँछु, सबैले त्यसमा भोट हाल्ने हो,’ अध्यक्ष ओलीले आफूलाई भेट्न आउने प्रतिनिधिलाई भन्ने गरेका छन्।
स्रोतका अनुसार पोखरेल समूहले ओलीले बनाउने सूचीपछि मात्र आफ्नो समूह घोषणा गर्ने तयारी गरेको छ। तथापि पोखरेल समूहले सुरेन्द्र पाण्डेलाई नै महासचिवमा अघि सार्ने सम्भावना छ।
ओलीले महासचिवका रूपमा ज्ञवालीलाई उम्मेदवार बनाए पोखरेल समूहले पनि उम्मेदवार फेर्न सक्छ। पोखरेल समूहमा सचिव गोकर्ण विष्ट र योगेश भट्टराई महासचिवका आकांक्षी छन्।
***
-1763886130.jpeg)
-1746009348.jpg)
