नेपाली कांग्रेसका महामन्त्री विश्वप्रकाश शर्माले वैशाखमा चुनाव गर्नुपरे पनि स्वाभाविक रूपमा लिनुपर्ने बताएका छन्।
फागुन २१ को चुनावी मितिप्रति आफूहरू प्रतिबद्ध भए पनि जेनजी समूहलाई अपनत्वमा गाँस्न, विश्वसनीय चुनावी वातावरण बनाउन र हिमाली क्षेत्रलाई सहज बनाउन वैशाखमा चुनावमा गर्नुपरे पनि स्वाभाविक रूपमा स्वीकार गर्नुपर्ने उनले बताएका हुन्।
'हामी सबै त्यो मितिप्रति प्रतिबद्ध छौं। तर मूल प्रश्न समाधान र संविधान हो,' उनले शुक्रबार बिहान सामाजिक सञ्जाल फेसबुकमा लेखेका छन्, 'सहमति र सहकार्यमार्फत आगामी यात्रालाई सहज बनाउनु हामी सबैको साझा दायित्व हो।'
महामन्त्री शर्माले सरकार र जेनजी प्रतिनिधिहरूबीच बुधबार हस्ताक्षर भएको १० बुँदे सम्झौताको स्वागत गरेका छन्। सँगसँगै, उक्त सम्झौतामा राजनीतिक दलहरूलाई सहभागी गराउनुपर्नेमा उनको जोड छ।
दलहरूलाई सामेल गराएको भए यो सम्झौता आगामी दिनका लागि भरपर्दो हुने उनले बताएका छन्।
'विभिन्न आन्दोलनको जगमा प्राप्त उपलब्धि संस्थागत गर्दै अघि बढ्ने सहमति महत्त्वपूर्ण छ। मूलत: जेनजी प्रदर्शनले स्थापित गरेको 'सुशासनको संकल्प र अठोट' आगामी दिनका लागि सबैको साझा जिम्मेवारी र साझा कर्तव्य बन्नुपर्छ,' उनी फेसबुकमा लेख्छन्।
'राजनीतिक दलहरू लोकतन्त्रको मुख्य र अविच्छिन्न सारथि हुन् भन्ने तथ्य हेक्का राखेर सरकारले सहमतिको हस्ताक्षर गरिरहँदा दलहरूलाई स्वामित्व र अपनत्वमा गाँस्न सक्नुपर्थ्यो। त्यसो गरेर 'भोलिका लागि भरपर्दो' बनाउन सरकार नचुक्नु पर्थ्यो।'
सम्झौताको प्रारम्भिक कार्यान्वयन क्रममा सरकारले गम्भीरता राख्न जरूरी भएको उनले उल्लेख गरेका छन्।
उनी लेख्छन्, 'भदौ २३ को बल प्रयोग उपरको कारबाही सँगसँगै २४ गतेको ध्वंसको गहिरो छानबिन र कारबाहीको विषयमा बिनामोलाहिजा राज्य प्रस्तुत हुनुपर्छ।'
सरकार र जेनजी सम्झौता कार्यान्वयनमा अत्यावश्यक समय लगाइरहँदा फागुन २१ को मिति बाधक बन्न नहुने उनको भनाइ छ।
1611210295.jpg)
-1763886130.jpeg)
-1746009348.jpg)
