जनकपुर नाइट्सले केबी साम नेपाल कबड्डी लिग (एनकेएल) को फाइनलमा स्थान बनाएको छ।
राष्ट्रिय खेलकुद परिषदको त्रिपुरेश्वरस्थित कभर्डहलमा सोमबार भएको पहिलो क्वालिफायरमा विराटनगर ब्यान्डिट्सलाई ३४-३२ अंकको रोमाञ्चक जित निकाल्दै जनकपुर फाइनलमा पुगेको हो।
अब सोमबार नै काठमाडौं र धनगढीले इलिमिनेटरमा प्रतिस्पर्धा गर्नेछन्। यो खेलको विजेतासँग विराटनगरले क्वालिफायर-२ मा खेल्नेछ। क्वालिफायर-२ को विजेता र जनकपुरबीच उपाधि भिडन्त हुनेछ।
६ सहरका ६ टिम सहभागी कबड्डीको पहिलो संस्करणमा जनकपुर नाइट्स (२३), विराटनगर ब्यान्डिट्स (२१), काठमाडौं माभरिक्स (१९) र धनगढी वाइल्डक्याट्स (११) ले लिगको शीर्ष चारमा रहँदै प्लेअफमा स्थान बनाएका थिए। पुछारका दुई टिम पोखरा लेकर्स (४ अंक) र बुटवलको हिमालयन रेइडर्स (७ अंक) भने लिग चरणबाटै बाहिरिए ।
एस्ट्रोनिक्स म्यानेजमेन्टद्वारा आयोजित एनकेएलमा ७ वा त्योभन्दा कम अन्तरको हारमा टिमले १ अंक पाउने प्रावधान छ। जित्ने टिमले ५ अंक र स्कोर बराबरी भएमा ३–३ अंक प्राप्त हुन्छ।
