प्रधानमन्त्री केपी शर्मा ओलीले इलन मस्कसँग गरेको भर्चुअल कुराकानीबारे संसदमा कुरा उठेको छ।
प्रधानमन्त्री ओली र मस्कबीच गत मंसिर ७ गते कुराकानी भएको थियो।
उक्त कुराकानीको पाँच महिनापछि सत्ताघटक नेपाली कांग्रेसका सांसद राजेन्द्र बजगाईले यो प्रसंगमा सोमबारको प्रतिनिधि सभा बैठकमा कुरा उठाएका हुन्।
‘मैले स्टारलिंकका लागि वकालत गरेँ। स्पेस एक्सकी अध्यक्ष गवीन सर्टवेलसँग कुरा गरेँ, सम्माननीय प्रधानमन्त्रीसँग कुराकानी गर्ने भने पनि पछि निर्धारित बैठक प्रक्रियाबाट अलग गरियो,’ बजगाईले भने, ‘इलन मस्कसँगको संवादमा मलाई छुटाइयो, त्यो संवाद सफल हुनुपर्थ्यो। तर त्यो बैठकमा ज्यादा राजनीतिक र हाम्रो तर्फ माइक्रोफोन बिग्रिएर इलन मस्कले सम्माननीय प्रधानमन्त्रीलाई सुन्न नसकेको इमेल पाएँ। भविष्यसँग डर होइन, स्टारलिंक सैन्यकरण भएको छैन। यो समान पहुँचको माध्यम हो।’
