खानेपानीमन्त्री प्रदीप यादवले नेतृत्व केवल सत्ताको कुर्सी मात्र नभई नागरिकसँगको ईमानदार सम्बन्ध पनि भएकाले जनताले प्रत्यक्ष अनुभूति गर्ने खालको विकास आफुले गर्दै आएको बताएका छन्।
सोमबार मोरङको रङ्गेली दोस्रो खानेपानी आयोजनाको शिलान्यास कार्यक्रमलाई सम्बोधन गर्दै उनले सीमित स्रोत र साधनबीच उत्कृष्ट काम गर्नुपर्ने दायित्व आफूहरूमा रहेकाले तीनै तहका सरकारसँग समन्वय गरेर आफ्नो दायित्वलाई जिम्मेवारपूर्वक ढंगले निर्वाह गर्नुपर्ने बताए।
‘हामी नागरिकको सेवामा सर्मपित छौं। हाम्रो नेतृत्व केवल सत्ताको कुर्सी मात्र होइन, नागरिक सँगको इमानदार सम्बन्ध पनि हो,’ उनले भने, ‘रङ्गेलीको माटोले विकासको सशक्त चाहना राखेको छ। यो आयोजनाको शिलान्यास त्यसै चाहना र सम्भावनाको मूर्त रूप हो।’
उनले समृद्ध नेपाल, सुखी नेपालीको परिकल्पना र प्रधानमन्त्री केपी शर्मा ओली नेतृत्वको सरकारले लिएको सामाजिक न्यायको मार्गदर्शनमा सोमबार रङ्गेली दोस्रो खानेपानी आयोजना मार्फत एउटा नयाँ युगको सुरुवातको ढोका खोलिएको बताए।
समावेशी विकास र नागरिकको आधारभूत अधिकार सुनिश्चित गर्ने राष्ट्रिय लक्ष्यप्रति प्रतिबद्ध रही, देशैभर खानेपानी तथा सरसफाइका पूर्वाधार निर्माणमा तीव्रता दिई सरकारको ‘एक घर, एक धारा’ भन्ने लक्ष्यलाई अब सम्भावनाबाट यथार्थतर्फ डोर्याउन थालेको समेत मन्त्री यादवको जिकिर थियो।
‘हामी नेपाली जनताका सेवक हौं। जनताको खुशी नै सरकारको खुशी हो,’ उनले भने, ‘नागरिकको आधारभूत अधिकार सुनिश्चित गर्न प्रधानमन्त्री केपी शर्मा ओली नेतृत्वको यो सरकार पूर्ण प्रतिबद्ध रहेको छ। जनताले प्रत्यक्ष अनुभूति गर्ने खालको विकासको काम हामीले गरेर देखाउँदैछौं।’
सन् २०३० सम्म सबै नेपाली नागरिकलाई सुरक्षित खानेपानी र सरसफाइ सेवा उपलब्ध गराउने दिगो विकास लक्ष्य प्राप्तिका दिशामा सरकारले आफ्ना काम र योजनालाई अघि बढाइरहेको समेत उनले जानकारी दिए।
