नेपाल नागरिक उड्डयन प्राधिकरण विभाजनको विरोधमा कर्मचारीहरू आन्दोलनमा उत्रिएका छन्।
सरकारले उड्डयन प्राधिकरणलाई सेवाप्रदायक र नियामक छुट्टै बनाउने तयारी गरिरहँदा कर्मचारी भने आन्दोलनमा उत्रिएका हुन्।
यसअघि प्राधिकरणको आधिकारिक ट्रेड युनियनले पर्यटनमन्त्रीलाई सात दिने अल्टिमेटमसहित ज्ञापन पत्र बुझाएको थियो।
सरकारबाट पेस गरिएका विधेयक फिर्ता लिन गरिएको मागको सुनुवाई नभएको भन्दै ट्रेड युनियनले शनिबारदेखि विरोधका कार्यक्रम सुरू गरेका हुन्।
उनीहरूले शनिबार देशभरका विमानस्थलमा कालो ब्यानर प्रदर्शन गरेका थिए। आइतबार कालोपट्टी बाधेका छन्।
यससँगै सोमबार, मंगलबार, बुधबार र बिहीबार पेन डाउनको कार्यक्रम राखेका छन्।
साथै प्राधिकरणका सबै कार्यालयमा विधेयक फिर्ता लिन माग गरिएको ब्यानर समेत टाँसेका छन्।
सरकारले प्राधिकरणको हालको संरचनालाई अलग बनाउने विधेयक गत माघ १९ गते संघीय संसदमा र फागुन १३ मा प्रतिनिधि सभामा दर्ता गरेको थियो।
त्यसयता कर्मचारीहरू भने प्राधिकरणलाई विभाजन गर्न नहुने भनिरहेका थिए।
