नेपाल उद्योग परिसंघ (सिएनआइ) का अध्यक्ष राजेशकुमार अग्रवालले पर्यटन उद्योगलाई उच्च प्राथमिकतामा राख्न सरकारलाई आग्रह गरेका छन्।
परिसंघद्वारा आयोजित पूर्व-बजेट अन्तरक्रियामा उनले पर्यटनलाई विदेशी मुद्रा आर्जन र रोजगारी सिर्जनाको महत्वपूर्ण स्रोत भएकोले विशेष प्राथमिकतामा राख्न आग्रह गरेका हुन्।
उनले निजी क्षेत्रबाट पर्यटन उद्योगमा खर्बौं लगानी भएको तथा सरकारले पनि विमानस्थल, सडकजस्ता पूर्वाधारमा अर्बौं खर्च गरे पनि प्रभावकारी नीति नबन्दा अपेक्षित लाभ लिन नसकिएको गुनासो गरे।
पर्यटन प्रवर्द्धनका लागि हवाई टिकटमा लगाइएको भ्याट हटाउनुपर्ने, राष्ट्रिय ध्वजाबाहक नेपाल वायुसेवा निगमलाई प्रतिस्पर्धी बनाउन सुधार योजना ल्याउनुपर्ने, र युरोपेली संघको हवाई सुरक्षा सूचीबाट नेपाललाई हटाउन कूटनीतिक पहल गर्न उनले सुझाए।
आन्तरिक पर्यटन प्रवर्द्धन गर्न प्रत्येक परिवारले वार्षिक एक लाख रुपैयाँसम्म भ्रमण खर्च करयोग्य आयबाट कट्टी गर्न पाउने व्यवस्था गर्न अध्यक्ष अग्रवालले आग्रह गरे।
पर्यटन काज बिदा पुन: लागू गर्नुपर्ने, र बुद्धिष्ट पर्यटक लक्षित अभियान सञ्चालन गर्नुपर्ने उनको भनाइ छ।
पर्यटन क्षेत्रको दीर्घकालीन विकासका लागि नीति निर्माणमा निजी क्षेत्रका सुझावलाई समेट्न उनले सरकारलाई आग्रह समेत गरे।
