सिचुवान एयरलाइन्सले पोखराबाट चीनको छेन्दु चार्टर्ड उडान गर्ने भएको छ। आउँदो चैत ५ गतेदेखि सातामा एउटा उडानका दरले १० वटा उडान गर्ने तयारी पूरा भएको पोखराका मेयर धनराज आचार्यले बताए।
'पोखराबाट चीनको पर्यटकीय सहर छेन्दु नियमित उडानको तयारी भइरहेको छ। चैत ५ गतेदेखि कमर्सियल चार्टर्ड फ्लाइट हुँदैछ,' उनले भने, 'अहिलेसम्म १० वटा उडानको तयारी भइसक्यो, नियमित उडान गर्न चुनौती छ।'
चीनको सरकारी ट्राभल एजेन्सीमार्फत सिचुवान एयरलाइन्सबाट पोखरा आउन एक हजार २५० जना तयार भइसकेको उनले बताए।
पोखराबाट चीन फर्किँदा कम्तीमा तीन वटा उडानमा एयरलाइन्सले पोखरेली व्यवसायीको साथ खोजेको पोखरा पर्यटन परिषदका अध्यक्ष तारानाथ पहारीले बताए।
'हामी पोखराका पर्यटन व्यवसायी छेन्दु जाने र त्यहाँ पोखराको प्रवर्द्धन गर्ने तयारी गरेका छौं,' उनले भने, 'तीन वटा उडानमा यहाँका व्यवसायी जानु हुनेछ।'
मेयर आचार्यका अनुसार पोखराबाट छेन्दु जाउआउ र सात रात, आठ दिनको प्याकेज टुर पनि बनाइएको छ। उक्त टुर प्याकेजको मूल्य अहिलेलाई १ लाख २३ हजार रूपैयाँ रहेको उनले जानकारी दिए।
'यो पैसामा छेन्दु गएर आउने र छेन्दुमा बस्ने, खाने, घुम्ने सबै प्याकेज छ,' उनले भने, 'प्याकेज नलिनेका लागि आउने-जाने टिकटको ६२ देखि ६५ हजार रूपैया पर्छ।'
उक्त प्याकेजमा सिचुवानका विभिन्न पर्यटकीय स्थलहरूको अवलोकन गर्न पाइने छ। यस्तै चीनबाट नेपाल आउने चिनियाँ पर्यटकले पनि पोखरा आसपासका साथै चितवन र काठमाडौं पनि घुम्ने गरी प्याकेज बनाइएको छ।
चीनमा सबभन्दा धेरै पर्यटक जाने र चीनबाट बाहिर घुम्न जाने पर्यटक सिचुवान प्रान्तकै भएकाले पोखरा र सिचुवानबीच नियमित हवाई उडान गर्नुपर्ने उनले बताए। नियमित उडान गर्न सके नेपालबाट अन्य देश जानेहरूका लागि पनि छेन्दु ट्रान्जिट हुन सक्ने उनको अपेक्षा छ।
'पोखरा अन्तर्राष्ट्रिय विमानस्थल चलाउन चुनौती छ। सिचुवान एयरलाइन्सको कमर्सियल चार्टर्ड उडानबाट नियमित उडानमा परिणत हुनेमा म विश्वस्त छु,' उनले भने, 'सुरूआतमा केही समय समस्या आउँछ, त्यसको सहजीकरण हामी गर्छौं।'
चीनको केन्द्र शासित प्रान्त सिचुवानमा ९ करोड जसंख्या छ। घुम्न बाहिरी देश जाने सबभन्दा बढी चिनियाँ नागरिक पनि सिचुवान प्रान्तकै भएको उनले बताए।
पोखराबाट चीन जाँदा पहिलो उडानमा मेयर आचार्यको नेतृत्वमा जनप्रतिनिधि र पोखराका पर्यटन व्यवसायी जानेछन्। दोस्रोमा पोखरा उद्योग वाणिज्य संघ र तेस्रोमा सामाजिक संघसंस्थाका व्यक्तिलाई छेन्दु भ्रमण गर्न प्रोत्साहन गरेको उनले बताए।
जहाज चीन फर्किँदा निर्यात गर्न सकिने उत्पादन पनि पठाउन सकिने भन्दै मेयर आचार्यले यसबारे आफूले छलफल अघि बढाएको बताए।
पोखराबाट छेन्दु नियमित उडान गर्न महानगरपालिकाका साथै पोखरा पर्यटन परिषद, नेपालमा रहेका चिनियाँ व्यवसायीका संस्था चाइनिज ओभरसिज एसोसिएसन लगायतले सहकार्य गरेका छन्।
यस्तै हिमालय एयरलाइन्सले चैत १८ गतेदेखि पोखराबाट चीनको ल्हासा नियमित उडान भर्ने तयारी गरेको छ।
