अमेरिकी बजारमा नेपालको साहसिक पर्यटन गन्तव्यको प्रचार तथा प्रवर्द्धन गरिएको छ।
अमेरिकाको कोलोराडोस्थित डेन्वरमा भएको 'ट्राभल एण्ड एडभेन्चर शो-२०२५' मा नेपाल पर्यटन बोर्डले नेपाललाई विश्वमै 'साहसिक पर्यटन राजधानी' को प्रस्तुत गरेको हो।
यही मार्च ८-९ मा सम्पन्न 'ट्राभल एण्ड एड्भेन्चर शो-२०२५' मा नेपाल पर्यटन बोर्डले एक विशेष कार्यक्रमको आयोजना गर्दै नेपाललाई एक साहसिक र सुरक्षित पर्यटन गन्तव्यको रूपमा प्रस्तुत गरिएको बोर्डले जनाएको छ।
सोही कार्यक्रमकाबीच बोर्डले कार्यक्रममा सहभागी पर्यटन व्यवसायीमध्यबाट लक्की ड्र मार्फत एक जनालाई सगरमाथा आधार शिविरसम्मको पदयात्रा नि:शुल्क गराउने भएको छ।
उक्त लक्की ड्र अमेरिकी पर्यटन व्यवसायी उपला सेफर्टले जितेकी हुन्। उनले यही मार्चदेखि मेसम्ममा नेपाल भ्रमण गरिसक्नु पर्नेछ। नेपाल भ्रमणका क्रममा लाग्न खर्च बोर्डले व्यहोर्ने भएको छ।
यसले अमेरिकी बजारमा नेपालको पर्यटन प्रवर्द्धन र प्रचारका लागि थप मद्दत पुग्ने बोर्डको विश्वास छ।
'ट्राभल एण्ड एड्भेन्चर शो-२०२५' आधिकारिक वेबसाइट अनुसार नेपाललाई साहसिक यात्राको राजधानीको रूपमा उल्लेख गरिएको छ।
जसमा भनिएको छ, 'विश्वका ८ हजारभन्दा अग्ला १४ वटा शिखरमध्ये ८ वटा नेपालमै पर्छन्। यसकारण पनि नेपाल 'पर्वतारोहीको लागि उत्कृष्ट' गन्तव्य हो। अद्भूत प्राकृतिक सौन्दर्य, भौगोलिक विविधता र समृद्ध सांस्कृतिक धरोहरले नेपाललाई साहसिक यात्रा गर्नेहरुका लागि अनुपम अनुभव प्रदान गर्दछ।'
नेपाल पदयात्राबाहेक पर्वतारोहण, र्याफ्टिङ, प्याराग्लाइडिङ, बन्जी जम्पिङ, जिप-लाइनिङ, जंगल सफारीजस्ता साहसिक पर्यटकीय गतिविधिहरूले पनि संसारमा चिनिएको उक्त वेबसाइटमा उल्लेख छ।
कोरोना महामारीपछि नेपालमा पर्यटक भित्र्याउनका लागि बोर्डले संसारका विभिन्न मुलुकहरूमा पर्यटन प्रवर्द्धन, प्रचार र पर्यकीय गतिविधिहरुमा तीव्रता दिइरहेको छ।
'ट्राभल एण्ड एड्भेन्चर शो-२०२५' मा नेपालका ९ वटा निजि पर्यटन व्यवसायीहरूको सहभागिता रहेको थियो।
नेपालले आयोजना गरेको विशेष कार्यक्रममा ५५ वटा अमेरिकी टुर अपरेटर कम्पनीका प्रमुख तथा प्रतिनिधिहरूको सहभागिता रहेको थियो।
