यती एयरलाइन्सले शनिबार एकैदिन सुर्खेत र धनगढी विमानस्थलमा सफलतापूर्वक परीक्षण उडान सम्पन्न भएको छ।
यती एयरलाइन्सको (एन–एएमएन एटिआर ७२) विमानले कर्णाली प्रदेशको सुर्खेत विमानस्थल र सुदूरपश्चिम प्रदेशको धनगढी विमानस्थलमा सफलतापूर्वक परीक्षण उडान गरेको हो।
नेपालगञ्ज विमानस्थलबाट उडेको यतीको विमान सुर्खेत विमानस्थलमा शनिबार दिउँसो १२:१७ मा अवतरण गरेको थियो भने नेपालगञ्जबाटै उडेको सोही विमान दिउँसो २:४५ बजे धनगढी विमानस्थलमा अवतरण गरेको थियो।
परीक्षण उडानलाई एयरलाइन्सका प्रशिक्षक पाइलटहरूद्वय क्याप्टेन समर्थरत्न तुलाधर र क्याप्टेन राजु राजवंशिले उडान भरेका थिए।
उडानको अवलोकनका लागि नेपाल नागरिक उड्डयन प्राधिकरण तथा यती एयरलाइन्सका प्राविधिक तथ प्रतिनिधिहरूको टोली साथमा गएका थिए।
गत मंगलबार यती एयरलाइन्सले राजविराज विमानस्थलमा पनि सफलतापूर्वक परीक्षण उडान सम्पन्न गरिसकेको छ।
यतीले उक्त विमानस्थलहरूमा निकट भविष्यमा नियमित उडान गर्ने तथा वैकल्पिक विमानको रूपमा प्रयोग गर्ने उद्देश्यले परीक्षण उडान गरेको हो। हाल यी विमानस्थलहरुमा यतीले उडान गर्ने गरेको छैन, परीक्षण उडानको रिपोर्टको आधारमा आगामी दिनमा नियमित उडान गर्ने तयारी गरेको छ।
यात्रुहरूको मागलाई ध्यानमा राखी उडानको दायरा बढाउँदै आफ्नो बजार हिस्सा विस्तार गर्ने उद्देश्य लिएको यती एयरलाइन्सका एकाउन्टेवल म्यानेजर तथा प्रमुख व्यापार अधिकृत युवराज कुमार विष्टले जानकारी दिए।
उनले यी विमानस्थलहरूमा हुने नियमित उडानसँगै यती एयरलाइन्सप्रतिको यात्रुहरूको विश्वास तथा माया अझ बढ्ने धारणा व्यक्त गरे।
यतीमा हाल यात्रुहरूको अकुपेन्सी दर ८५–९० प्रतिशतसम्म रहेको छ।
यती ले ७ वटा एटिआर ७२ विमानमार्फत नियमित रुपमा काठमाडौं, चन्द्रगढी, विराटनगर, जनकपुर, सिमरा, पोखरा, भैरहवा, नेपालगञ्ज विमानस्थल लगायत पर्वतीय उडानहरू गर्दै आएको छ।
