स्याङ्जाको अर्जुनचौपारी गाउँपालिका धार्मिक पर्यटनको उत्कृष्ट गन्तव्य बन्दैछ।
पालिकाको वडा-१ मा नेपालमै पहिलोपटक नवग्रह मन्दिरको निर्माण अन्तिम चरणमा पुगेसँगै अर्जुन चौपारी धार्मिक गन्तव्यका रुपमा विकसित हुन लागेको हो।
नवग्रह मन्दिरको प्राण प्रतिष्ठा तथा अनुष्ठान महाशिवरात्रीको अवसर पारेर फागुन ६ देखि १४ गतेसम्म १ करोड २५ लाख दियो प्रज्वलन गरी भव्य रुपमा गर्ने गाउँपालिकाको तयारी छ।
विभिन्न शक्तिपीठहरुमा एक छेउमा नवग्रहको प्रतिमा राखेर पुजा गर्ने गरिएतापनि देश विदेशमा सिद्धीप्राप्त योगीहरुले यो ठाउँमा नवग्रह मन्दिर निर्माण गर्नु अत्यन्तै उपयुक्त हुने सल्लाहबमोजिम नवग्रहको मन्दिर निर्माण गरिएको पालिका अध्यक्ष प्रकाश तिवारीले बताए।
नवग्रह (नौ आकाशीय पिण्ड) को मन्दिर भारतको आसामको चित्रसालको पहाडमा मात्र रहेको छ।
निर्माण हुँदै गरेको मन्दिर भारतको आसामकोभन्दा फरक रहेको पालिका अध्यक्ष प्रकाश तिवारीले बताए।
नवग्रह मन्दिरको मुख्य स्तभ नवभुज आकारको हुनेछ। २७ फिट माथीतिर फर्केको अग्लो ब्रह्माणीय मूर्तिको अवलोकन प्रत्येक वर्षको गणेश चतुदर्शीमा (एक पटक) मात्र गर्न पाइनेछ।
नवग्रह मन्दिरसँगै बनाइएको षट्कोणको बीचमा पशुपतिनाथकोजस्तै पञ्चमूखी शिवलिङ्ग राखिने र अन्य कोणमा गणेश, कुलदेवता, लक्ष्मी, कालभैरव, हनुमान र दुर्गा भवानीको मूर्ति राखिएको छ ।
मन्दिरको एक ठाउँबाट छिरेपछि ९ चक्रमा रहेका नवग्रह मन्दिरलाई ९ परिक्रमा सहितको पूजा गरेपछि मात्र बाहिर निस्कन मिल्ने गरी निर्माण गरिएको छ।
नौवटा भुजा रहने पिलरमा १३ फिटमा नौवटा ग्रहका प्रतिक रहेका छन् भने त्यस माथी नवभुज आकारको १४ फुटको पिलर छन्। पिलरको सबैभन्दा माथि सूर्यतर्फ फर्केको सौर्यमण्डलीय (ग्रह) को प्रतिमा रहने छ।
धार्मिक गुरू तत्वदर्शी ब्रहमनिष्ट सन्त शिरोमणी स्वामी लोकानन्द महाराजले निर्माणाधीन नवग्रह मन्दिरको अवलोकनसमेत गरिसकेको मन्दिर व्यवस्थापन समितिका अध्यक्ष भरत पोखरेलले बताए।
मन्दिर शनिबार मात्र खुल्नेछ र ९ चक्रमध्ये एक चक्र भने भक्तजनहरुलाई मध्यनजर गरेर अन्य दिनमा पनि पुजाआजा गर्न पाइनेछ।
गण्डकी प्रदेशको राजधानी पोखराबाट करिब ५२ कि.मी.को दुरीमा रहेको नवग्रह मन्दिर निर्माणसँगै स्वदेशी तथा विदेशी पर्यटक आकर्षित हुने पालिकाको विश्वास छ।
