आइएमई ग्रुपको लगानीमा बाग्लुङमा इला कम्फर्ट होटल सञ्चालनमा आएको छ।
शनिबार संस्कृत पर्यटन तथा नागरिक उड्डयन मन्त्री बद्री पाण्डेको उपस्थितिमा इला कम्फर्ट होटलको उद्घाटन गरिएको हो।
इला कम्फर्टका अध्यक्ष सचिन ढकालका अनुसार यो होटल ३ रोपनी क्षेत्रमा फैलिएको छ।
३० करोड रुपैयाँ लगानीमा सञ्चालनमा आएको यो होटलमा ३० वटा कोठा छन्। थ्री स्टारको मान्यता बराबरको यो होटलको रूमभित्रका सुविधा भने ५ तारे सरहको रहेको अध्यक्ष ढकालले जानकारी गराए।
आइएमई ग्रुपका अध्यक्ष चन्द्र ढकालले आमाको घरको रुपमा यो होटल सञ्चालमा आएको बताए।
'नेपाल उद्योग वाणिज्य महासङ्घको वरिष्ठ उपाध्यक्षमा निर्वाचित भएपछि हामी परिवारसहित महासंघका केही साथीहरु बाग्लुङ आएका थियौं। एउटै होटलमा स्पेस नपुगेपछि त्यतिबेला हामी सबै एकै ठाउँमा बस्न सकेनौँ। त्यसबेला आमाले एउटा घर भएको भए त हामी सँगै बस्थ्यौं भन्नुभएको थियो। त्यही विषयले छोएर यहाँ आमाको घरका रुपमा इला कन्फर्ट होटल स्थापना गरेका हौं,' ढकालले भने।
होटल उद्घाटन कार्यक्रममा अध्यक्ष ढकालले पर्यटन पूर्वाधारमा निरन्तर लगानी बढाउँदै जाने बताएका छन्। उनले सातै प्रदेशमा सात ठूला पूर्वाधार बनाउने गरी आफूले काम गरिरहेको बताए। आफूले लगानी गर्ने सबै क्षेत्र जनताको लाभ र सरकारको प्राथमिकतालाई ध्यान दिएको उनले बताए। सरकारले हालै गरेको कानुन संशोधनबाट निजी क्षेत्रलाई हौसला मिलेको पनि अध्यक्ष ढकालले बताए।
संस्कृति पर्यटन तथा नागरिक उड्डयनमन्त्री पाण्डेले पहाडी जिल्ला बाग्लुङमा सुविधा सम्पन्न होटल उद्घाटनले आशाको उद्घाटन पनि गरेको बताए।
उनले नेपालकै ठूलो व्यवसायीले पर्यटन क्षेत्रलाई केन्द्रित गरेर लगानी गर्नुले पर्यटन उद्योगको भविष्य देखाएको बताए।
'आज होटल मात्र होइन आशाको उद्घाटन भएको छ, यति ठूलो र सफल घरना पर्यटन क्षेत्रमा प्रवेशले खुसी लागेको छ, यसले पर्यटनको भविष्य देखाएको छ,' पाण्डेले भने। होटल पूर्वाधारले पर्यटन क्षेत्रमा ठूलो असर पार्ने उनको भनाइ छ।
नेपाली कांग्रेसका सहमहामन्त्री जीवन परियार, कांग्रेस सांसद दीपक गिरी लगायतका वक्ताले एउटा सुविधा सम्पन्न होटलको स्थापनाले यो क्षेत्रको पर्यटन प्रवर्द्धनमा ठूलो टेवा पुग्ने बताए।
गण्डकी पदेशका स्वास्थ्य मन्त्री कृष्ण पाठकले निजी क्षेत्र र लगानीलाई राज्यले विशेष प्राथमिकतामा राखेर काम गर्नु पर्ने बताए।
होटल पोखरा विमानस्थलबाट केवल १.५ घण्टाको दूरीमा अवस्थित छ। पोखरा र बागलुङबीच प्रत्येक ३० मिनेटमा नियमित सार्वजनिक यातायात चल्ने भएकोले, होटलले आन्तरिक र अन्तर्राष्ट्रिय यात्रुहरूको लागि सुविधाजनक पहुँचमा रहेको छ ।
इला कम्फर्ट बागलुङले इला ब्राण्डको होटल विस्तार रणनीतिको पहिलो चरणको प्रतिनिधित्व गरेको छ। नवलपरासीको गैँडाकोटमामा इला होटल सुरु गर्ने तयारी भइरहेको छ भने नेपालका सबै सातै प्रदेशहरूमा सेवा विस्तार गर्ने योजना छ ।
