एशोसिएशन अफ नेपाल तराई इन् अस्ट्रेलिया (एन्टा)को आयोजनामा शनिबार ग्रानभिल पार्कमा होली हंगामा आयोजना गरी शुभकामना आदन प्रदान गरेको छ।
ह्वाइट स्पट ग्रुपको प्रस्तुती रहेको सो होली मेलामा अस्ट्रेलियाका चर्चित नेपाली कलाकारहरूको प्रस्तुतीसहित नेपाली खाना र तराई, मधेस झल्किने विशेष प्रस्तुति समेटिएको थियो।
स्थानीय ग्रानभिल क्षेत्रकी सांसद जुलिया फिनले औपचारिक रुपमा होली पर्वको शुभारम्भ गर्दै बहुसांस्कृतिक समाजको सुन्दरता भनेको सबै धर्म, जात र कला संस्कृतिको सम्मान गर्नु रहेको बताइन्। रंगको पर्वको रुपमा मनाइने होलीले अस्ट्रेलियामा समेत चर्चा पाइसकेको उनले बताइन्।
कार्यक्रममा एनआरएन ओसेनियाका उप संयोजक अरुण ठाकुरले रंगको पर्वको रहेको होली राष्ट्रिय पर्व बनिसकेको र विदेशमा बस्दै गर्दा पनि यसको महत्व बिर्सनु नहुने बताए।
एन्टाका अध्यक्ष रन्जित शाहले नेपालबाट सात समुन्द्रपारी विदेश आए पनि हामीले आफनो कला संस्कृति बिर्सन नुहने बताउँदै सहयोग र सद्भावका साथ भव्य रूपमा सफल बनाउन सहयोग गर्ने मनहरूलाई धन्यवाद ज्ञापन गरे।
अध्यक्ष शाहले नेपाली कला संस्कृतिको जर्गेना गर्ने उद्धेश्यका साथ पनि सिडनीमा एन्टाले होली पर्व आयोजना गर्दै आएको बताए। एन्टाका बोर्ड अफ डाइरेक्टर अंगद मिश्राले कार्यक्रमको सफलताको कामना गर्दै अस्ट्रेलियामा आएर पनि होली मनाउन पाउनु गर्वको विषय रहेको बताए।
कार्यक्रममा गायक सुदीन पोखरेलको गीतले युवावर्गमा निकै रंग ल्याएको थियो। यस्तै निर्देशक सोभित बस्नेतले बन्दै गरेको नयाँ चलचित्र पीआरको चर्चा गर्दै यसका कलाकारलाई स्टेजमा उतारेका थिए।
होली हंगामामा कलाकारहरु आरिफ रौफ, शुसान्त गौतम, सन्ध्या जोशी, उल्सन श्रेष्ठ , समय ब्यान्ड, डिजे नटकेस, मानस राज, जेनिशा गौतम लगायतको विशेष प्रस्तुती रहेको थियो।
