अस्ट्रेलियाको मेलवर्नमा शनिबार नेपाल फेस्टिबल हुँदैछ। नेपाल फेस्टिभलको सम्पुर्ण तयारी पूरा भइसकेको गैरआवासीय नेपाली संघ (एनआरएनए)का प्रवक्ता बबिन मिश्रले जानकारी दिए।
शनिबार १० बजेदेखि सुरु हुने कार्यक्रमका लागि फेडेरेसन स्क्वायरमा आउन मिश्रले सम्पुर्ण नेपाली समुदायलाई आग्रह गरेका छन्।
'मेलवर्नमा गर्मी छ। गर्मीले नेपाल महोत्सवलाई प्रभाव नपारोस् भनेर छाता र पानी सबैको व्यवस्था गरेका छौं,' मिश्रले भने, 'यो कार्यक्रम तपाई हामी सबैको हो। विशेषगरी दोस्रो पुस्तालाई यो कार्यक्रमको अझै महत्व छ। उनीहरुलाई नेपाल चिनाउने एउटा महत्वपूर्ण अवसर समेत हो।'
नेपाली कला संस्कृति रितिरिवाज तथा नेपालको पर्यटकीयस्थलको प्रवर्द्धन गरी अस्ट्रेलियामा बस्ने नेपालीबीच सद्भाव एकता र भाइचारा बढाउने हेतुले हरेक दुई वर्षमा अस्ट्रेलियाका सबै राज्यमा महोत्सवको आयोजना गरिँदै आएको छ।
एनआरएन भिक्टोरियाका युवा संयोजक सिद श्रेष्ठका अनुसार १३० भन्दा बढी बालबालिकाले नेपाल फेस्टिभलमा आफ्नो विभिन्न प्रस्तुति दिने तय भएको छ।
श्रेष्ठका अनुसार गायन, नृत्य, प्रहसन मात्र होइन कार्यक्रम सञ्चालनको जिम्मेवारी पनि यहीँ हुर्किएका नेपाली युवापुस्ताले लिँदैछ।
विभिन्न क्षेत्रमा सञ्चालनमा रहेका भाषा विद्यालयमा अध्ययन गरिरहेका बालबालिकाहरुले कार्यक्रममा आफ्नो प्रस्तुति दिन लागेका हुन्।
'हाम्रो टिम पाठशालामा गएर नेपाल फेस्टिभल के हो, यहाँ जाँदा के हुन्छ। यसको महत्व कस्तो हो भनेर हामीले बुझाएका छौं,´ उनले भने, ´कार्यक्रमका बारेमा जानकारी पाएपछि नानीहरु उत्साहित छन्।´
एनआरएन भिक्टोरिया नारी निकुञ्जकी संयोजक राशीसिंह ठकुरीका अनुसार १८ भन्दा बढी प्रस्तुतिमा दोस्रो पुस्ताको सहभागिता रहने तय भएको छ।
उनले स्वयंसेवकको रुपमा पनि नेपाली समुदायको युवापुस्ताले योगदान दिने जानकारी दिइन्।
नेपाल फेस्टिभल मेलबर्नको सांस्कृतिक परेडबाहेक पनि चार घन्टा विभिन्न उमेर समूहका अस्ट्रेलियन नेपाली युवाहरुले आफ्नो प्रस्तुति दिनेछन्।
कार्यक्रमको सञ्चालन, स्वयंसेवा लगायतलाई जोड्ने हो भने नेपाल फेस्टिभलकै सफलतापूर्वक आयोजनामा उनीहरुको भूमिका महत्वपूर्ण रहनेछ।
यी प्रस्तुतिमा नेपालको हिमाल, पहाड र तराईका विभिन्न जात जाति, भाषा, संस्कृति र परम्पराको प्रदर्शनबाट नेपाली समाज आफैंमा पनि बहुसांस्कृतिक समाज हो भन्ने सन्देश दिने मुख्य उद्देश्य रहेको छ।
एनआरएनए अस्ट्रेलियाका उपाध्यक्ष एवं भिक्टोरिया राज्यका संयोजक मणिरत्न सापकोटाले महोत्सवमा ८ वटा खानाका स्टल रहने र एउटा नेपाली बियरसहितको पेय पदार्थको छुट्टै स्टल रहने उनले जानकारी दिए। सहयोगी संस्थासहित अन्य ३० वटा जति व्यवसायी स्टल रहने उनले बताए।
भिक्टोरियाका लागि नेपाली वाणिज्य दूत निराजन गौंलीले मेलवर्नको नेपाल महोत्सवमा पहिलो पटक भिक्टोरिया राज्यकी प्रिमियर जसिन्टा एलान सहभागी हुने बताए।
'भिक्टोरीया राज्यका प्रिमियर सहित सत्तारुढ लेवर पार्टी र विपक्षी लिवरल पार्टीका नेताहरु कार्यक्रम सहभागी हुनु हाम्रो लागि गर्वको कुरा हो। यो उपस्थितिले अस्ट्रेलियाको मूलधारको राजनीतिमा हाम्रो भूमिका बढ्दै गएको प्रष्ट हुन्छ,' उनले भने,'अस्ट्रेलियाका लागि नेपाली राजदूत चित्रलेखा यादावको उपस्थितिले कार्यक्रमलाई अझै महत्वपुर्ण बनाउने हाम्रो अपेक्षा छ। हामीले नेपाल फेस्टिभलमा जानकी मन्दिरको प्रारूप प्रदर्शन गर्दैछौं। जसले नेपाली कला र संस्कृतीको संरक्षणमा थप सहयोग पुग्नेछ।'
महोत्सवका लागि २ लाख २० हजार डलर खर्च हुने अनुमान रहेको एनआरएनए अस्ट्रेलियाका प्रवक्ता मिश्रले जानकारी दिए।
यसका लागि अस्ट्रेलियाको कमन वेल्थ बैंक बाहेक अरू सबै नेपाली समुदायका व्यावसायिक संस्थाको आर्थिक सहयोग रहेको उनले बताए।
जसमा एक्सपर्ट एजुकेशन एण्ड भिसा, सल्भ एजुकेशन एन्ड माइग्रेसन, काठमाडौं प्रोपटिज्, स्टुडेन्ट डेस्टिनी, सेन्ट्रल अस्ट्रेलियन कलेज, ग्रेस इन्टरनेशनल एजुकेशन एण्ड माइग्रेसन, म्याक्सीम्याक्स एजुकेशन एण्ड माइग्रेसन सर्भिस, न्यु एजुकेशनल कन्सल्टेन्सी, भिरीकल माइग्रेशन एण्ड एजुकेशन,न्यु एजुकेशनल कन्सल्टेन्सी, एलाइन्स स्टेट एजेन्ट,रत्न ज्वेलर्स,बुद्ध टुर्स एण्ड ट्राभल्स छन्।
२००७ मा पहिलो पटक नेपाल फेस्टिभल भएको थियो। मार्च १५ मा फेडरेशन स्क्वायरमा हुने नेपाल महोत्सव सातौं संस्करण हो।
