अस्ट्रेलियाका लागि नेपालकी राजदूत चित्रलेखा यादवले नारी संघर्षकै कारण नेपालमा महिलाहरूको लागि ३३ प्रतिशत हक सुरक्षित हुन सकेको बताएकी छन्।
नारी निकुञ्ज अस्ट्रेलियाले अन्तर्राष्ट्रिय नारी दिवसको अवसरमा सिड्नीमा गरेको कार्यक्रममा बोल्दै नेपाली राजदूत यादवले महिलाहरूलाई समान अवसर र नेतृत्वमा ल्याउन सके महिला अधिकार र सशक्तीकरणमा उल्लेख्य प्रगति हुने बताइन्।
'हामीले महिला अधिकारका लागि धेरै संघर्ष गर्यौं। त्यही भएर राज्यका निकायहरूमा महिलाको उपस्थिति बढेको छ,' उनले भनिन्, 'संसदमा ३३ प्रतिशत महिला, स्थानीय तहमा प्रमुख या उप-उपप्रमुख महिला उम्मेदवार बन्नैपर्ने, सभामुख र उपसभामुखमा एक जना महिला हुनैपर्ने प्रावधान राख्न सफल भयौं।'
कार्यक्रममा एनआरएन अस्ट्रेलियाका अध्यक्ष अनिल पोखरेलले नेपाली समाजमा घरेलु हिंसा एक गम्भीर चुनौतीका रूपमा आएको बताएका थिए। यसलाई सबै मिलेर कम गर्नुपर्ने धारणा उनको थियो।
नारी निकुञ्ज अस्ट्रेलियाकी संयोजक संगीता चापागाईंले अस्ट्रेलियामा आफूहरूले महिला हिंसा, बालबालिका लगायतको क्षेत्रमा काम गरेको बताइन्।
नेपालमा पनि स्वास्थ्य क्षेत्रमा विभिन्न कार्यक्रमहरू गरेको जानकारी गराउँदै उनले पाठेघरको मुखको क्यान्सर, महिनावारी, प्रजनन् स्वास्थ्य समस्याका बारेमा नेपालका विभिन्न ठाउँमा सचेतनासहित सहयोगका काम गरिरहेको बताइन्।
