बलिउड अभिनेत्री सुस्मिता सेनले ललित मोदीसँगको सम्बन्धबारे नयाँ खुलासा गरेकी छन्।
उनले एक अन्तर्वार्तामा ललितसँग आफ्नो सम्बन्ध जीवनको एक चरण भएको बताएकी हुन्।
भारतका व्यापारी ललितसँगको प्रेम सम्बन्धका बारेमा सुस्मिताले भर्खरै सामाजिक सञ्जालमा भनेकी छन्, 'मैले भर्खरै इन्स्टाग्राममा एउटा पोस्ट राखेको छु किनकि कहिलेकाहीँ मलाई लाग्छ जब मानिसहरू चुप बस्छन्, तिनीहरूको मौनतालाई कमजोरी वा डरको रूपमा लिइन्छ। म हाँसेको छु भनेर उनीहरूलाई थाहा दिनका लागि मैले एउटा पोस्ट राखेकी छु।'
उनले थप भनेकी छन्, 'म सबै मिमको मजा लिइरहेकी छु। तर यदि तपाईं कसैलाई गोल्डडिगर भनिरहनुभएको छ भने कम्तीमा उसलाई पैसामा नतौलिनुस्। आफ्नो तथ्य जाँच गर्नुहोस्। मलाई सुन होइन, हिरा मन पर्छ। जे भए पनि, त्यो अर्को अनुभव थियो। अर्को चरण थियो। ती कुराहरू भए। यदि म कसैसँग विवाह गर्न जाँदैछु भने म विवाह गर्नेछु। नभए गर्दिनँ।'
सामाजिक सञ्जालमा ललितसँगको सम्बन्धको बारेमा धेरै हल्ला भएपछि सुस्मिताले इन्स्टाग्राममा यसबारे खुलेर बताएकी हुन्। धेरैले उनलाई ललितसँग बिहे गरेको हो कि भनेर पनि सोधेका थिए।
उनले आफ्नो औंलामा औंठी नभएको भन्दै आफ्नो बिहे नभएको जानकारी दिएकी हुन्। भारतीय सञ्चारमाध्यमहरूले भने सुस्मिता हाल पूर्व प्रेमी रोहमन शलसँगकै सम्बन्धमा रहेको बताएका छन्। हालै दिपावलीको एक भोजमा उनीहरूसँगै देखिएका थिए।
केही समयअगाडि ललित मोदीले सुस्मिता र आफू प्रेम सम्बन्धमा रहेको बताएका थिए। त्यस्तै अभिनेत्री सुस्मिताले पनि ललित मोदीको प्रेममा रहेको स्वीकार गरेकी थिइन्।
सन् १९९४ मा मिस युनिभर्सको ताज पहिरिएलगत्तै बलिउड प्रवेश गरेकी सुस्मिताको फिल्मी करिअर कहिल्यै पनि खासै जमेन। उनका फिल्महरू हिट त हुन्थे तर उनले समकालीनहरूको दाँजोमा अलग्गै पहिचान बनाउन सकेकी थिइनन्।
आफ्नो लामो करिअरमा उनका यादगार सिनेमा खासै छैनन्। यसबीच पछिल्लो १० वर्ष उनी बलिउडबाट पूरै हराइन्। आफ्नो स्वास्थ्य उपचार र दुई जना छोरीको लालनपालनमै व्यस्त भएकाले करिअरबाट विश्राम लिएको उनले बताएकी छन्।
दस वर्षपछि उनले गत वर्ष डिज्ने स्टारको वेबसिरिज 'आर्या' मार्फत् कमब्याक गरेकी छन्। यो वेबसिरिजको दोस्रो र तेस्रो संस्करण पनि रिलिज भइसकेको छ।
'आर्या' मा सुस्मिताको अभिनय यति दमदार छ, यसलाई उनको करिअरकै सबभन्दा उत्कृष्ट भनिँदै आएको छ। कति समीक्षकहरूले त यो वेबसिरिजलाई सुस्मिताको कमब्याक नभएर, बलिउडमा इन्ट्रीका रूपमा लिएका छन्।
विगतका फिल्महरूबाट खासै छाप छाड्न नसकेकी पूर्वमिस युनिभर्स सुस्मिताले २७ वर्षपछि वेबसिरिजबाट पहिलोपटक आफ्नो अभिनय क्षमता देखाएको समीक्षकहरूको भनाइ छ।
'आर्या' को पहिलो संस्करणबाट सुस्मिता सेनले थुप्रै अवार्डहरू पनि जितेकी छन्।
