सिराहा गोलबजार नगरपालिका–१३ का १५ वर्षीय अभिषेक सिंहको अपहरणपछि उनकी आमाको मोबाइलमा धम्कीपूर्ण म्यासेज आएको प्रहरी अनुसन्धानमा पाइएको छ।
आइतबार राति साढे ८ बजेतिर खाना खाएर बाहिर निस्केका अभिषेक सोमबार बिहानसम्म कतै भेटिएका थिएनन्।
उनकी आमा रेखा सिंहले छोरा हराएको भनेर वडाध्यक्ष नन्दकुमार महतोलाई फोन गरेर घर बोलाएकी थिइन्। त्यही बेला उनले प्रयोग गर्ने सामाजिक सञ्जाल 'इमो' मा अपहरणकर्ताको धम्कीपूर्ण मेसेज आएको उनको काका रामकुमार महतोले जानकारी दिए।
'मेसेजमा ५ करोड रूपैयाँ मागिएको थियो। नदिए तपाईंको छोरा मारिदन्छौं भनेर भनिएको थियो,' रामकुमारले भने, 'हामीले इमोमा मेसेज पठाउने नम्बरमा तुरून्तै फोन गर्दा स्वीच अफ थियो।'
जिल्ला प्रहरी कार्यालय सिराहाको एसपी अनन्तराम शर्माले पनि मेसेजमा ५ करोड रूपैयाँ फिरौती मागिएको र प्रहरीलाई खबर गरे ज्यान मार्ने धम्की दिइएको पुष्टि गरे।
त्यति ठूलो रकम माग गरिएपछि रेखा सिंह आफन्तहरूसँग सहयोग माग्ने तयारीमा थिइन्। सामान्य कृषि गरेर गुजारा चलाइरहेकी रेखाका लागि ५ करोड धेरै ठूलो रकम भएको रामकुमार बताउँछन्।
'अभिषेकको बुबा करेन्ट लागेर केही वर्षअगाडि नै बितिसक्नुभयो। त्यसैले त्यो रकम जुटाउन सक्ने अवस्था थिएन,' उनले भने, 'भतिजले नै ट्याक्टर चलाएर आमाछोराको गुजारा चलाइरहेका थिए।'
अभिषेकले ४/५ कक्षाभन्दा माथि पढेका छैनन्। बुबा बितेपछि आमालाई सघाउन ट्याक्टर चलाउन थालेका थिए।
अहिले गाउँमा झिझिया नाच चलिरहेको छ। अभिषेक आइतबार राति त्यही नाच हेर्न गएका होलान् भन्ने आमाले सोचेकी थिइन्। राति ढिलासम्म नआएपछि खोजतलास सुरू गरिएको रामकुमारको भनाइ छ।
'सोमबार मेसेज आएपछि खोजतलासको काम भइरहेको थियो। मंगलबार बिहान गाउँका मानिस खेतमा काम गर्न निस्किँदा अभिषेकको शव बस्ती नजिकै भेटिएको उनले जानकारी दिए।
स्थानीयले शव देखेपछि प्रहरीलाई फोन गरेका हुन्। अहिले प्रहरीले घटनास्थल पुगेर बालकको शव उठाउने काम गरिरहेको छ।
जिल्ला प्रहरी कार्यालय सिराहाको एसपी अनन्तराम शर्माका अनुसार घर नजिकै शव भेटिएकाले आफन्तहरूलाई नियन्त्रणमा लिएर सोधपुछ गर्ने काम भइरहेको छ।
यो पनि :
अपहरणपछि मागिएको थियो ५ करोड फिरौती, बालक मृत भेटिएपछि आफन्तहरूसँग सोधपुछ
-1758614109.jpg)
-1746009348.jpg)
