पछिल्ला समय बलिउडमा चर्चित नाम मध्ये अभिनेता प्रभास देखिएका छन्। तेलुगु र तमिलमा काम गर्दै आएका उनले बलिउड फिल्ममा पनि काम गरिसकेका छन्।
सन् २००२ मा तेलुगु नाटक 'ईश्वर' बाट अभिनय यात्रा सुरू गरेका प्रभासले बलिउड सुपरस्टार सलमान खान र शाहरूख खानलाई पछाडि पारेका छन्। बलिउडका दर्शकले खानका फिल्महरूमा भन्दा प्रभासको फिल्ममा बढी चासो देखाएका छन्।
'मिर्ची' फिल्ममा अभिनय गरेको कारण प्रभासलाई दक्षिण भारतीय राज्यले सर्वश्रेष्ठ अभिनेताको लागि 'नन्द पुरस्कार' ले सम्मान गरेको थियो। उनले अभिनय गरेका फिल्महरूले दर्शकको मन जित्न सफल भएका छन्। उनको फिल्म 'बाहुबली' ले झनै राम्रो कमाइ गर्नुको साथै उनको फिल्मी यात्रालाई समेत प्रेरणा दिलायो।
उनको अर्को फिल्म पनि आउँदैछ। अर्को फिल्म 'सालार पार्ट १' को टिजर रिलिज भइसकेको छ। यो फिल्ममा उनी एक शानदार फाइटरको रूपमा देखिएका छन्। यसै क्रममा यता सलमान र शाहरूखको पनि नयाँ फिल्म आउँदैछन्। तर बुक माय शो अनुसार प्रभासको फिल्मलाई हेर्न रूचाउने दर्शकको संख्या ४२९.९ हजार देखिन्छ। यो आकँडा फिल्म रिलिज साइटमा देखाइको अध्ययन अनुसारको हो। यही आँकडा अनुसार सलमानको फिल्म 'टाइगर ३' लाई हेर्न रूचाउने दर्शकको संख्या २७१.१ हजार छ। त्यस्तै शाहरूखको फिल्म 'डंकी' लाई हेर्न रूचाउने दर्शकको संख्या जम्मा ९७.५ हजार रहेको छ।
बलिउडका सुपरस्टार भनेर चिनिने सलमान र शाहरूखको फिल्म पछिल्ला समय कम प्रख्यात भएका छन्। यसको कारण उनीहरूले नयाँभन्दा पुरानै तरिकाले फिल्ममा अभिनय देखाएकोमा दर्शक सन्तुष्ट नभएको भन्ने कुराहरू पनि बाहिरिएको छ। अझै भन्नुपर्दा शाहरूखको भन्दा सलमानको झन् फिल्महरूलाई दर्शकले कम रूचाएका छन्। पछिल्ला समय यी दुई खानहरू दक्षिणी अभिनेत्रीहरूसँग देखिँदैआएका छन्।
प्रभासको 'सालार पार्ट १' फिल्ममा दक्षिण भारतीय अभिनेता पृथ्वीराज सुकुमारन पनि देखिँदै छन्। उनीहरूसँगै अभिनेत्री श्रुति हसनको पनि मुख्य भूमिका छ। फिल्मलाई प्रशान्त नीलले निर्देशन गरेका हुन्। 'केजिएफ' निर्देशन गरिसकेका प्रशान्तले प्रभाससँग पहिलो पटक काम गर्दैछन्।
