चौथो कृष्ण प्रसाद भट्टराई स्मृति राष्ट्रिय कराते प्रतियोगिताको दोस्रो दिन पनि नेपाल प्रहरीको वर्चस्व रहयो। कुमुतेतर्फ आज भएको ७ स्पर्धामा प्रहरीले ६ स्वर्ण र एपिएफले १ स्वर्ण जिते।
१२ वटा स्वर्णको छिनोफानो हुँदा प्रहरीले १० तथा आर्मी र एपिएफले समान १ स्वर्ण प्राप्त गरेका छन्।
ललितपुरस्थित कराते एकेडेमीमा आज भएको ७५ केजी तौल समुहमा १३औं दक्षिण एसियाली खेलकुदका कास्य विजेता नेपाल प्रहरीका राजीव पुडासैनीले स्वर्ण जिते। उनले सुदर पश्चिमका योगेश सिंह बिष्टलाई हराए। आर्मीका शिबु ओड र रुरेहाङ्ग डुमी राईले कास्य हात पारे।
पुरूष ६७ केजी मुनिको तौल समुहमा नेपाल प्रहरीका सन्तोष श्रेष्ठले एकपक्षीय फाइनलमा गण्डकी प्रदेशका सक्षम लामालाई ९-० को अन्तरमा हराउँदै स्वर्ण जिते। सुदूर पश्चिमका खड्ग थामी मगर र कोशी प्रदेशका मनिष विक तेस्रो भए।
५० केजीमा प्रहरीका साजन मोक्तान पहिलो भए। उनले फाइनलमा बाग्तीका लेख राज घिमिरेलाई प्रतिस्पर्धात्मक फाइनलमा ७-५ ले माथ दिए। यो स्पर्धामा गण्डकी प्रदेशका बोमिन गुरूङ र मधेश प्रदेशका सोहन मगरले तेस्रो स्थानमा चित बुझाए।
८४ केजी पुरूषतर्फ मोहम्मद शेखु अलामले एपिएफलाई पहिलो स्वर्ण दिलाए। उनले फाइनलमा कोशीका धन राईलाई सहजै ९-२ ले हराए। मोहम्मदले एसियाली खेलकुदमा नेपालको प्रतिनिधित्व गरेका थिए। आर्मीका सुरेश जप्रेल र बागमती प्रदेशका सलमान मोहम्मदले कास्य पदक प्राप्त गरे।
महिला ५५ केजीमा प्रहरीकी पुष्पका लामाले स्वर्ण जित्ने क्रममा कर्णाली प्रदेशकी प्रियंका शाहीलाई ५-० ले पराजित गरिन्। गण्डकीकी प्रभा राई र सुदुरपश्चिमकी गरीमा मल्ल तेस्रो भए।
४५ केजीमा पनि प्रहरीकी वर्षा बुढा मगर पहिलो भईन्। उनले लुम्बिनी प्रदेशकी पुजा राईलाई ११-३ ले हराइन्। गण्डकीकी सबुना राना मगर र आर्मीकी ममता महर्जन तेस्रो भए।
६१ केजीमा प्रहरीकी निरूपा दोङ्ग तामाङले सहजै स्वर्ण जितिन्। उनले फाइनलमा सुदुर पश्चिमकी सोनिया तिरूवा लाई ९-१ ले पराजित गरिन्। यो स्पर्धामा एपिएफकी रमिता माझी र कोशी प्रदेशकी धन कुमारी मगरले तेस्रो स्थान हात पारे।
प्रतियोगिताको अनमेतिम दिन भोलि ५ स्पर्धाम प्रतिस्पर्धा हुनेछ। यो प्रतियोगिताको स्वर्ण, रजत र कास्य पदक प्राप्त गर्ने खेलाडी सिधै राष्ट्रिय कराते टोलीको छनोट राउन्ड रोविनमा खेल्न पाउनेछन्।
