इजरायलमा सम्पर्कविहीन भएका कञ्चनपुरका विपिन जोशीको खोजी भइरहेको परराष्ट्र मन्त्रालयले बताएको छ।
मन्त्रालयमा बुधबार पत्रकार सम्मेलन गर्दै प्रवक्ता सेवा लम्सालले सम्पर्कविहीन जोशीको खोजी भइरहेको बताइन्।
गत शनिबार इजरायलको दक्षिणी भागमा हमासले गरेको आक्रमणका क्रममा: १० जना नेपाली विद्यार्थीको मृत्यु भएको थियो।
मृत्यु भएका विद्यार्थीको शव इजरायल सरकारको संरक्षणमा सुरक्षितसँग राखिएको परराष्ट्र मन्त्रालयले जनाएको छ।
शव जतिसक्दो छिटो नेपाल ल्याउने विषयमा इजरायल सरकारसँग उच्च प्राथमिकताका साथ समन्वय भइरहेको उनले जानकारी दिइन्।
शव नेपाल ल्याउनेबित्तिकै परिवारलाई बुझाउने उनको भनाइ छ।
आक्रमणमा परेर घाइते भएका चार जनामध्ये दुई जना उपचारपछि डिस्चार्ज भएका छन्।
बाँकी दुई जनाको अहिले पनि उपचार भइरहेको छ।
प्रवक्ता लम्सालले इजरालयमा रहेका राजदूतलगायत कर्मचारी पनि बंकरबाट काम गरिरहेको बताएकी छन्।
बंकरमा आश्रय लिएका नेपाली विद्यार्थीहरूलाई सरकारले सुरक्षित ठाउँमा स्थानान्तरण गरिसकेको छ।
