भारतीय वायुसेवा कम्पनी एयर इन्डिया एक्सप्रेस र स्पाइसजेट एयरले नेपालमा उडान थालेका छन्।
यी दुबै वायुसेवाले अप्रिल १ अर्थात् मंगलबारदेखि काठमाडौंमा नियमित उडान थालेका हुन्।
दुईमध्ये एयर इन्डिया एक्सप्रेस नेपालमा पहिलो पटक आएको हो। एयर इन्डियाको दुई वटा कम्पनी छ। यसअघि पनि एयर इन्डियाले काठमाडौंमा नियमित उडान गरिरहेको छ। एयर इन्डियाले दिल्लीबाट उडान गर्छ।
एयर इन्डिया एक्सप्रेसले दिल्लीभन्दा बाहिरका सहरबाट उडान गर्दै आइरहेको छ। नागरिक उड्डयन प्राधिकरणका अनुसार एक्सप्रेसले मुम्बुई–काठमाडौं र बैंग्लोर–काठमाडौं गरी दैनिक दुई वटा उडान सुरू गरेको छ।
त्यस्तै कोभिडअघि नियमित उडानमा रहेको स्पाइसजेटले पनि पुनः उडान थालेको छ।
प्राधिकरणका अनुसार भारतीय सस्तो भाडादरको वायुसेवा मानिने स्पाइसजेट कोरोना अगाडि नेपालमा नियमित उडान गर्दै आएको थियो। यसले भारतको दिल्लीबाट काठमाडौं उडान गर्ने भएको छ।
नयाँ दुई वायुसेवासँगै भारतबाट नियमित उडान गर्ने वायुसेवाको संख्या ४ पुगेको छ।
