संस्कृति,पर्यटन तथा नागरिक उड्डयनमन्त्री बद्री पाण्डेले पर्यटन दशकले मुलुकले प्रत्यक्ष वा अप्रत्यक्ष रूपमा ठूलो लाभ लिने विश्वास व्यक्त गरेका छन्।
प्रदेश सरकार, पर्यटन वन तथा वातावरण मन्त्रालय कोशी प्रदेशद्वारा आयोजित स्वागत कार्यक्रममा बोल्दै मन्त्री पाण्डेले पर्यटन दशकले नेपाललाई ठूलो लाभ प्राप्त हुने बताएका हुन्।
सन् २०२२ देखि सुरू हुने भनिएको पर्यटक दशक कोभिड–१९ का कारण अघि बढ्न सकेको थिएन।
जसकारण सन् २०२५–३५ सम्मका लागि पर्यटन दशकको रूपमा मनाउने गरि तयारी भइरहेको उनले बताए।
'अहिले यसका लागि कार्ययोजना बनिरहेको छ, उनले भने, 'कोशी पर्यटन मन्त्रालयले २०२५ लाई पर्यटन वर्षको रूपमा मनाउँदै छ। त्यसका लागि यो मन्त्रालय फोकल मन्त्रालय भए पनि होटल व्यवसायी र पर्यटन व्यवसायीको ठूलो योगदान रहने छ। यसले पर्यटन दशकलाई समेत ठूलो योगदान गर्नेछ।'
उनले पर्यटन दशक मनाउने काम निकै महत्वकांक्षी रहेको उल्लेख गर्दै यसले स्वदेशमै स्वरोजगार सिर्जना गर्न सक्ने विश्वास व्यक्त गरे।
मन्त्री पाण्डेले पर्यटन दशकले विदेशमा रहेकालाई समेत स्वदेशमै लगानी गरौं भन्ने वातावरण सिर्जना हुने समेत बताए।
मन्त्री पाण्डेले पर्यटन क्षेत्र मुलुकको आर्थिक मेरुदण्डको मूल आधार रहेको बताउँदै अथितिदेवो भवः को मूल मन्त्रलाई आत्मसाथ गरी अघि बढ्नुपर्नेमा जोड दिए।
