यती एयरलाइन्सले सञ्चालन गरेको चाडपर्व विशेष 'यतीसँग, उत्सवको उमङ्ग' योजनाको बम्पर उपहार ग्रीस्मा खनालले जितेकी छिन्।
अन्तर्राष्ट्रिय नागरिक उड्डयन दिवसको अवसर पारेर यती एयरलाइन्सले फेसबुक लाइभमार्फत् गरेको 'लक्की ड्र' गरेको छ, जसमा ग्रीस्मा खनालले सिट्रोनको तर्फबाट पानारोमा बेनेली १२५ सिसीको स्कुटर प्राप्त गरेकी हुन्।
उनले यती एयरलाइन्समा मंसिर १४ गते काडमाडौं–भैरहवा यात्रा गरेकी थिइन्।
यस्तै, दोस्रो पुरस्कार मंसिर १२ गते काठमाडौं–विराटनगर उडान गरेका राजेन्द्र राईले हात पारेका छन्। उनले श्री रिद्धिसिद्धि ज्वेलर्सको तर्फबाट डायमण्डको चेन प्राप्त गरेका छन्।
यसैगरी, तेस्रो पुरस्कारको रुपमा पाल्सोनिकको फ्रिज सृजना केसीले प्राप्त गरेकी छिन्। उनले यती एयरलाइन्समार्फत् मंसिर १२ गते काठमाडौं–नेपालगञ्ज उडान गरेकी थिइन्।
मासिक पुरस्कारको विजेताहरूमा अरुण कुमार यादव र पदम बहादुर बस्नेत रहेका छन्। उनीहरुले नथिङ नेपालको तर्फबाट सिएमएफ एयरवर्ड प्राप्त गरेका हुन्।
साप्ताहिक पुरस्कार जित्नेहरूमा भने तारादेवी बस्नेत, श्रीपति शाहु, सन्जु कृष्ण भट्टराई, डम्बर प्रसाद तिमिल्सिना, रुपेश धिमाल, विकास गुरुङ्ग, रुजन तुलाधर, अनुज ढकाल रहेका छन्। उनीहरूले आइबिबी नेपालको तर्फबाट आकर्षक गिफ्टह्याम्पर प्राप्त गरेका छन्।
यती एयरलाइन्सले चाडपर्वको समयमा यात्रा गर्ने आफ्ना यात्रुहरूलाई लक्षित गरी २ महिना समयावधिको लागि (असोज २२ गतेदेखि मंसिर २१ गतेसम्म) 'यतीसँग, उत्सवको उमङ्ग' योजना सार्वजनिक गरेको थियो।
यस अवधिभर २ लाख ४ हजार ४ सय ८५ जना यती एयरलाइन्समा यात्रा गरेको बताइएको छ।
