पर्यटन पूर्वाधारयुक्त केबलकार परियोजना बन्दीपुर हिलमा तिहारको अवसरमा देउसी भैलो प्रतियोगिता हुने भएको छ।
'सङ्गीतमा झुम्दै, खानपिनमा रम्दै, चाडपर्व मनाऔँ, चाडपर्व उत्सव–२०८१ मा सहभागी बनौँ' भन्ने नारासहित बन्दीपुर केबलकारको प्रवर्द्धक कम्पनी बन्दीपुर हिलले ख्याति प्राप्त कलाकारहरूको साङ्गीतिक कार्यक्रमका साथ सो कार्यक्रम सञ्चालन गर्न लागेको हो।
बन्दीपुर केबलकारको लोअर स्टेसन, केबलकार चोकमा देउसी–भैलो प्रतियोगिता, टिकटक प्रतियोगिता, फन पार्क, रमाइलो मेला, फुड फेष्टिबल र स्थानीय हाटबजार कार्यक्रम सञ्चालन हुने बन्दीपुर हिलले जनाएको छ।
देउसी भैलो प्रतियोगितामा प्रथम पुरस्कार १ लाख रूपैयाँ, द्वितीय पुरस्कार ५० हजार, तृतीय पुरस्कार २५ हजार तथा सान्त्वना पुरस्कार १० हजार रूपैयाँ रहेको छ।
यस्तै, चाडपर्व उत्सवअन्तर्गत सञ्चालन हुने टिकटक प्रतियोगितामा बढी सेयर भएको भिडिओ, बढी भ्युज भएको भिडिओ र उत्कृष्ट भिडिओलाई जनही १० हजार रूपैयाँ दिइने कम्पनीले जनाएको छ।
साथै, चाडपर्व उत्सव कार्यक्रममा कलाकारहरू आशिस राना (लाहुरे), ज्योति मगर, रचना रिमाल, बिलम राज क्षेत्री, युवराज घर्ती, शान्ता रानी परियार, रेसम निर्दोश, रूपक डोटेल, विवेक, धिताल, आशा बिसी, राजेश बर्देवा लगायत कलाकारहरूको प्रस्तुति रहनेछ भने नृत्य तर्फ बिनु कार्की, सम्झना गुरुङ, सविता रानाले नृत्य प्रस्तुत गर्नेछन्।
उक्त कार्यक्रमको प्रायोजकमा बन्दीपुर केबलकार एण्ड टुरिजम लिमिटेड तथा प्रवर्द्धकमा ड्राइभ इन रेस्टुरेन्ट र टुरिजम इन्भेष्टमेन्ट फण्ड लिमिटेड रहेको कम्पनीले बताएको छ।
