छोटो समयमा दर्शकको मन जित्न सफल भएकी बलिउड अभिनेत्री अंकिता लोखंडे अहिले फेरि चर्चामा आएकी छन्।
भारतीय रियालिटी शो 'बिग बोस १७' मा प्रतिस्पर्धीको रूपमा देखिएकी अंकिता सामाजिक संजालमा ट्रोल समेत बनिरहेकी छन्। 'बिग बोस' मा उनलाई पति विक्की जैनको कारण पनि नकारात्मक टिप्पणी भइरहेको छ। शो मार्फत उनी आफूलाई दर्शक सामू फेरि प्रचार गर्न आएकी थिइन्। तर विक्कीको कारण उनी दु:खी भइरहेको शोमा देखाएको छ।
यसैबीच उनले आफ्नो पूर्व प्रेमी दिवंगत अभिनेता सुशान्त सिंह राजपूतलाई सम्झिएकी थिइन्। सुशान्तसँगको प्रेम सम्बन्धमा आफू खुशी भएको उनले याद गरेकी छन्।
सुशान्तसँगको प्रेम सम्बन्ध टुट्दाको पललाई सम्झिदै उनले भनिन्, 'हामी प्रेम सम्बन्धमा खुशी थियौं। तर सुशान्तले त्यो रात सबै खतम गरे। उनले सम्बन्ध तोडे। म एकदम नराम्रोसँग टुटेकी थिएँ। मैले त्यो सम्बन्ध टुट्नुको कारण आजसम्म थाहा पाउन सकेको छैन।'
‘ब्रेकअपपछि मलाई मान्छेहरूले अंकितालाई कसले बिहे गर्छ? कसले साथ दिन्छ जस्ता कुरा गरे। पछि त्यही मान्छेहरूले अंकिता भएको भए सुशान्त मर्ने थिएन भने। त्यो समय मैले पनि सुशान्त कुनैबेला मेरो थियो भनेर उनीमाथि आएको गलत कुराहरूसँग विरोध गरें,’ उनले भनिन्।
सुशान्तले केही नयाँ काम गर्दा आफूलाई सोधपुछ नगर्ने समेत उनले शोमा बताएकी छन्। सानातिना झगडा हुँदा आफूलाई बुझ्न नखाेजी सुशान्तले एक रातमा सम्बन्ध तोडेको अंकिताको आरोप छ।
सुशान्तसँगको प्रेम सम्बन्ध टुटेपछि आमाबाबुको साथसहयोगले नै अगाडि बढ्न सकेको उनले बताइन्।
अकिंताले भारतीय टेलिश्रृंखला 'पवित्र रिस्ता' बाट अभिनय यात्रा सुरू गरेकी थिइन्। यही टेलिश्रृंखलाबाट सुशान्त र उनको प्रेम सम्बन्ध अघि बढेको थियो। उनीहरूको जोडीलाई दर्शकले खुबै मन पराएका थिए। साथै उनले अभिनेत्री कंगना रनावतसँग फिल्म 'मनिकणिका' मा अभिनय गरेकी थिइन्।
