सन् २०२३ बलिउड फिल्म क्षेत्रका लागि सुखद रह्यो। अभिनेता शाहरूख खानको फिल्म 'पठान' ले सर्वाधिक कमाइ गर्ने हिन्दी फिल्मको रेकर्ड राख्यो।
यो फिल्मको रेकर्ड तोड्दै सनी देओलका फिल्म 'गदर २' ले सर्वाधिक कमाइ गर्ने हिन्दी फिल्मको रेकर्ड राख्यो। बक्स अफिसमा रेकर्ड तोड्ने सिलसिला यतिमै सीमित रहेन। १ महिनाभित्रै शाहरूख खानको फिल्म 'जवान' ले 'गदर २' को रेकर्ड तोड्यो।
यी सन् २०२३ मा सर्वाधिक कमाइ गर्न फिल्म हुन् भने अन्य फिल्मले पनि बक्स अफिसमा सुखद व्यापार गरे। जसमा करण जोहरको फिल्म 'रकी और रानीकी प्रेमकहानी', अक्षय कुमारको फिल्म 'ओ माइ गड २', कियारा अड्वानी र कार्तिक आर्यनको 'सत्यप्रेमकी कथा', विक्की कौशल र सारा अली खानको 'जरा हट्के जरा बचके' जस्ता फिल्म सामेल छन्।
टाइगर श्राफ र कृति सेनन अभिनीत फिल्म 'गणपत' भने सुपरफ्लप सावित भएको छ। यो फिल्म कात्तिक ३ गतेदेखि प्रदर्शन भइरहेको छ। तर फिल्मले भारतीय बक्स अफिसमा १२ करोड ३० लाख भारू मात्रै कमाएको छ। फिल्मले विश्वभरबाट १७ करोड १५ लाख कमाएको छ।
यो फिल्मको कमाइ दिनप्रति दिन घटिरहेको छ। यस्तो अवस्थामा फिल्मलाई १३ करोड कमाउन पनि मुस्किल हुने देखिएको छ।
यो फिल्मको बजेट २०० करोड भारू बताइएको छ। विकास बहलले लेखन तथा निर्देशन गरेको फिल्ममा टाइगर, अमिताभ बच्चन र कृति सेननको मुख्य भूमिका छ।
