सलमान खान र कट्रिना कैफ अभिनीत फिल्म 'टाइगर ३' को पहिलो गीत सोमबार सार्वजनिक भएको छ।
यशराज फिल्म्सको युट्युब च्यानलमार्फत् फिल्मको पहिलो गीत सार्वजनिक गरिएको हो। यो गीतमा कट्रिना सातवटा फरक-फरक लुकमा देखिएकी छन्।
'लेके प्रभुका नाम' बोलको यो गीत अरिजीत सिंह र निखिता गान्धीले गाएका हुन् भने यसमा प्रितमको संगीत र अमिताभ भट्टाचार्यको शब्द रहेको छ।
बलिउड अभिनेता सलमान खानका लागि अरिजीत सिंहले गाएको यो पहिलो गीत हो।
सन् २०१४ मा सलमानले एक अवार्ड कार्यक्रम होस्ट गरिरहँदा अरिजीतसँग उनको विवाद भएको थियो।
उक्त अवार्ड कार्यक्रममा अरिजीत फिल्म 'आशिकी २' को 'तुम हि हो' गीतबाट अवार्ड लिन गएका थिए। उनी साधारण चप्पल र हाफ ट्राउजरमा अवार्ड लिन पुगे। जब उनी स्टेजमा उक्ले, तब सलमानले उनलाई सोधे, 'निदाइरहनुभएको थियो?'
जवाफमा अरिजीतले भने, 'तपाईंहरूको शो हेर्दा हेर्दै निदाएछु।'
अरिजीतको उक्त जवाफपछि सलमानले आक्रोशित हुँदै भनेका थिए, 'यसमा हाम्रो कुनै दोष छैन, यस्ता गीत बजेपछि निन्द्रा त लागिहाल्छ नि!'
यो घटनापछि अरिजीतले सलमानसँग माफी मागेका थिए। तर सलमानले आफ्नो फिल्ममा अरिजीतको गीत नराख्ने अडान लिइरहे।
नौ वर्षपछि उक्त विवाद भुल्दै सलमान खानले 'टाइगर ३' मा अरिजीत सिंहलाई गीत गाउने अवसर दिएका हुन्। उनले यसअघि सामाजिक सञ्जालमार्फत् गीतको एक तस्बिर सार्वजनिक गर्दै लेखेका थिए, 'पहिलो गीतको पहिलो झलक- लेके प्रभुका नाम। मेरो लागि अरिजीत सिंहको पहिलो गीत। यो गीत २३ अक्टोबरमा सार्वजनिक हुनेछ।'
'टाइगर ३' यशराज फिल्म्सको स्पाइ युनिभर्सको फिल्म हो।
आदित्य चोपडाको लगानी रहेको फिल्मलाई मनिष शर्माले निर्देशन गरेका हुन्। फिल्ममा सलमान र कट्रिनासँगै इमरान हासमीको मुख्य भूमिका छ। यसमा इमरान खलनायकको भूमिकामा देखिएका छन्। फिल्मको कथा आदित्य चोपडाले तयार पारेका हुन्।
फिल्म हिन्दी, तमिल र तेलगूमा १२ नोभेम्बरदेखि प्रदर्शन हुनेछ।
यसका अघिल्ला सिरिज सन् २०१२ मा 'एक था टाइगर' र त्यसपछि 'टाइगर जिन्दा है' प्रदर्शन भएका थिए। 'टाइगर ३' पछि सलमान खान र शाहरूख खान 'टाइगर भर्सेस पठान' मा देखिने छन्।
