बलिउड अभिनेता सलमान खान र गायक अरिजीत सिंहको विवाद निकै चर्चामा रह्यो। उनीहरूको विवादपछि सलमानले आफ्नो फिल्ममा अरिजीतको गीत नराख्ने बताएका थिए।
९ वर्षपछि आफ्नो विवाद भुल्दै सलमान खानले आगामी फिल्म 'टाइगर ३' मा अरिजीत सिंहलाई गीत गाउने अवसर दिएका छन्।
बिहीबार सलमानले आफ्नो सामाजिक सञ्जालमार्फत गीतको एक तस्बिर सार्वजनिक गर्दै लेखेका छन्, 'पहिलो गीतको पहिलो झलक- लेके प्रभुका नाम। मेरो लागि अरिजीत सिंहको पहिलो गीत। यो गीत २३ अक्टोबरमा सार्वजनिक हुनेछ।'
सन् २०१४ मा सलमानले एक अवार्ड कार्यक्रम होस्ट गरिरहेका थिए। उक्त अवार्ड कार्यक्रममा अरिजीत सिंह फिल्म 'आशिकी २' को 'तुम हि हो' गीतबाट अवार्ड लिन गएका थिए।
अरिजीत साधरण चप्पल र हाफ ट्राउजरमा अवार्ड लिन पुगेका थिए। जब अरिजीत स्टेजमा पुगे तब सलमानले उनलाई सोधे, 'निदाई रहनु भएको थियो?'
'तपाईहरूको शो हेर्दा हेर्दै निदाएको हुँ,' उनले जवाफ दिए। अरिजीतको उक्त जवाफपछि सलमान आक्रोशित हुँदै भनेका थिए, 'यसमा हाम्रो कुनै दोष छैन, यस्ता गीत बजेपछि निन्द्रा त लागिहाल्छ नि!'
यस विवादपछि अरिजीतले सलमानसँग माफी समेत मागेका थिए।
