नेपाली कांग्रेसले असारभित्रै क्रियाशील सदस्यता नवीकरणका सम्पूर्ण काम सक्न मातहत समितिहरूलाई निर्देशन दिएको छ।
महामन्त्री गगन थापा नेतृत्वमा रहेको क्रियाशील सदस्यता व्यवस्थापन समितिको बुधबारको बैठकले असारभित्रै क्रियाशील नवीकरण कार्य सक्न जिल्ला कार्यसमिति लगायतलाई निर्देशन दिएको हो।
उक्त समितिले यसअघि वैशाख १५ गतेभित्र नवीकरणका काम सक्न भने पनि अधिकांश जिल्लाहरूले उक्त अवधिमा काम सम्पन्न गरेका थिएनन्।
क्रियाशील सदस्यता व्यवस्थापन समिति सदस्यमा केन्द्रीय सदस्यहरू सीता गुरूङ, योगेन्द्र चौधरी र प्रकाश रसाइली (स्नेही) छन्।
बुधबारको बैठकबारे जानकारी दिँदै सदस्य प्रकाश रसाइली स्नेहीले असारभित्रै नवीकरणका काम सक्न भनिएको बताए।
‘क्रियाशील सदस्यता नवीकरणका कार्य जिल्लाहरूमा ३० प्रतिशतदेखि ६० प्रतिशतसम्म पुगेको अवस्था छ, उक्त विवरण प्रणालीमा प्रविष्ट गर्ने काम पनि भइरहेको अवस्था छ,’ उनले भने, ‘असार मसान्तसम्म नवीकरण बुझाएन भने सिष्टम स्वत: बन्द हुने व्यवस्था गरिएको छ, त्यसपछि हामी नवीकरण प्रक्रियामा सहभागी हुँदैनौं।’
त्यसपछि वैज्ञानिक ढंगले नयाँ क्रियाशील वितरणको प्रक्रिया सुरू गरिने उनले बताए।
क्रियाशीलसम्बन्धी विवाद देखा परेका करिब १० वटा जिल्लाहरूमा क्रियाशील सदस्यता व्यवस्थापन समितिका सदस्यहरू नै जाने र समस्या समाधान गर्ने तयारीसमेत भएको उनले बताए।
