नेकपा (एमाले)का वरिष्ठ उपाध्यक्ष ईश्वर पोखरेलले एमालेलाई उसको भूमिकाबाट च्यूत गराउने कोसिस भइरहेको बताएका छन्।
शनिबार ललितपुरमा आयोजित मनमोहन अधिकारीको २६ औं स्मृति सभालाई सम्बोधन गर्दै वरिष्ठ उपाध्यक्ष पोखरेलले अनेक समस्याहरू छन् भनेर एमालेलाई कमजोर देखाउने कोसिस भइरहेको बताएका हुन्।
'एमालेलाई उसको भुमिकाबाट च्युत गराउनको लागि चौतर्फी कोशिस भइरहेको छ। यस्तो बेलामा मनमोहन अधिकारी हाम्रो अगाडि प्रेरणाको स्रोत र शितल छहारी बनेर हाम्रो अगाडि उभिनुभएको छ,' उनले भने।
पोखरेलले एमाले जस्तोसुकै परिस्थिति र अप्ठ्याराहरूसँग जुध्दै राष्ट्रिय स्वाभिमान र स्वतन्त्रताको पक्षमा, स्वाधिनताको पक्षमा, मुलुकलाई समृद्ध बनाउने कुराको पक्षमा, जनताको हक हितको पक्षमा दृढतापूर्वक उभिँदै आएको दाबी गरे।
'हिजो सत्तामा नभएको बेलामा, प्रतिकुल अवस्थामा होस् वा सत्तामा पुगेको बेलामा होस्। उसले यो मान्यताबाट आफूलाई कहिल्यै विचलित गराएन,' उनले भने।
मनमोहन अधिकारीले अघि सारेको सपना र कार्यक्रमहरूलाई एमालेले निरन्तरता दिने कोसिस गर्दै आएको पनि वरिष्ठ उपाध्यक्ष पोखरेलले बताए।
(न्युज एजेन्सी नेपाल)
