नेकपा एमाले निकट विद्यार्थी संगठन अनेरास्ववियुभित्र नेतृत्वमा उमेर हद लगाउनेबारे छलफल सुरू भएको छ।
अनेरास्ववियुको शनिबार बसेको सचिवालय बैठकमा यसबारे छलफल भएको संगठनका अध्यक्ष समिक कुमार बडालले जानकारी दिए।
शनिबारको सचिवालय बैठकमा पदाधिकारी सहित लेखा, अनुशासन र निर्वाचन आयोग अध्यक्षहरूले यसबारे धारणा राखे पनि निष्कर्ष भने निस्किएन।
उमेर हद लगाउनेबारे पदाधिकारीभित्र मत बाझिएपछि यसको निर्णय गर्ने सर्वाधिकार महाधिवेशनको हललाई नै दिने निर्णय भएको हो।
उनका अनुसार शनिबारको बैठकले विधान मस्यौदा लगायत कतिपय तयारी अपुग भएको भन्दै महाधिवेशन सार्ने निर्णय गर्यो। यसअघि बसेको स्थायी कमिटी बैठकले अनेरास्ववियु स्थापना दिवसकै अवसर पारेर जेठ १ देखि ५ गतेसम्म महाधिवेशन गर्ने निर्णय गरेको थियो।
शनिबारको बैठकले जेठ २५ देखि २७ गतेसम्म काठमाडौंमा महाधिवेशन गर्ने निर्णय गरेको छ।
उमेर हदको विषय भने महाधिवेशन हलमै लैजाने बडालले बताए।
'हामीले १२ सदस्यीय विधान मस्यौदा समिति बनाएका छौं। त्यसले मस्यौदा तयार पारेर महाधिवेशन हलमा लैजान्छ। त्यसबारे निर्णय महाधिवेशनले नै गर्नेछ,' उनले भने।
विधान मस्यौदा समिति महासचिव नरेश रोकायाको नेतृत्वमा छ। त्यसमा १० जना सचिव र संगठन विभाग प्रमुख रहने निर्णय गरिएको छ।
आज बसेको बैठकले उमेर हद ३०/३२ या खुला राख्ने अधिकार महाधिवेशनको हललाई नै दिने निर्णय गरेको बडालले बताए।
एक पदाधिकारीले दिएको जानकारी अनुसार आज सचिवालय निष्कर्षमा नपुगे पनि बैठकमा बोल्ने अधिकांश पदाधिकारी उमेर हदकै पक्षमा उभिएका छन्।
'हाम्रो २० जनाको सचिवालय छ। अध्यक्षसहित बहुमत साथीहरू उमेर हदको पक्षमा हुनुहुन्छ। महासचिव सहित केही पदाधिकारी उमेर हद होइन प्रतिस्पर्धा खुला राख्नुपर्छ, संगठनको नेतृत्व गर्ने मानिस विचार, राजनीति, अध्ययन र अनुभवमा पारंगत हुनुपर्छ भन्ने उहाँहरूको दृष्टिकोण देखिन्छ,' ती पदाधिकारीले भने।
उनका अनुसार संगठनका अध्यक्ष, चार उपाध्यक्ष उमेर हदको पक्षमा देखिएका छन्। १० सचिवमध्ये ६ जना सचिव उमेरह दको पक्षमा छन्।
त्यसमध्ये अधिकांश ३२ वर्षे उमेर हद राखेर जानुपर्ने पक्षमा रहेको ती पदाधिकारीले बताए।
३२ वर्षे उमेर हद राख्दा पाँच जना पदाधिकारी मात्रै बाँकी रहन्छन्। प्रकाश पौडेल, अन्जना सिवाकोटी, डा. सुजन कडरिया, दीपक धामी, आरती भट्टराई रहन्छन्। यी सबै सचिव हुन्।
३० वर्षे उमेर हद राख्दा अहिले भएका पदाधिकारीमध्ये सिवाकोटी र भट्टराई मात्रै बाँकी रहन्छन्।
प्रतिस्पर्धी नेपाली कांग्रेसनिकट नेबिसंघ र माओवादी केन्द्रनिकट अखिल क्रान्तिकारीले नेतृत्वमा उमेर हद लगाएपछि एमाले अखिल दबाबमा परेको हो। नेविसंघले संगठनमा २८ वर्षे उमे रहद लगाएको छ। अखिल क्रान्तिकारीले यही महाधिवेशनबाट २८ वर्षे उमेर हद लगाएको छ। उसले मतदानबाटै यसको छिनोफानो गरेको थियो।
त्यसो त अखिलले पनि नेतृत्वबाहेक उमेर हदको अभ्यास गरेको छ।
२३ औं महाधिवेशनमा उमेर हदको अभ्यास नगरे पनि त्यसपछि बसेको पहिलो बैठकले क्याम्पस कमिटीको अध्यक्ष २८ वर्षमुनिको हुनुपर्ने निर्णय गरेको थियो। त्यस्तै केन्द्रीय सदस्य ३० वर्षभन्दा मुनिका मात्रै मनोनीत गर्ने निर्णय गरेर तदनुरूप दोस्रो बैठकले कार्यान्वयन गरेको थियो।
स्वतन्त्र विद्यार्थी युनियनको अध्यक्ष पनि २८ वर्षभन्दा मुनिकै हुनुपर्ने व्यवस्था छ। २०६५ सालको स्ववियु चुनावपछि उम्मेदवार हुन २८ वर्ष पूरा नभएको हुनुपर्ने प्रावधान ल्याइयो। त्यस अनुसार २०७३, २०७९ साल र यस वर्ष त्यही उमेर हद अनुसार स्ववियु चुनाव भइसकेको छ।
केन्द्रीय सदस्य रचना खड्काले अनेरास्ववियुमा उमेर हद लागू हुने बताइन्।
उनले जनसंगठनलाई सामुदायीकरण गर्ने पार्टीको नीति रहेको बताइन्। जनसंगठनको स्रोत समुदायको जुन आधार हो, नेतृत्व त्यसैबाट छानिनुपर्ने नीति अनुसार कक्षाकोठाकै विद्यार्थी अखिलको नेता हुनुपर्ने पार्टीको मान्यता रहेको बताइन्।
'अहिलेमा उमेर हद राख्नुपर्ने मोटामोटी छलफल भएको छ। यही सचिवालय बैठकले निर्णय गर्ने तयारी पनि थियो। यसबारे आज छलफल भयो होला। समुदाय केन्द्रित जनसंगठन बनाउने नीति अनुरूप कक्षाकोठाकै विद्यार्थीले संगठनको नेतृत्व गर्ने दिशामै हामी जानुपर्छ,' उनले भनिन्।
उनी एमालेको जनसंगठन समन्वय संयन्त्रकी उपप्रमुख पनि हुन्।
महासचिव नरेश रोकाया भने आफू उमेर हद खुला राख्ने पक्षमा रहेको बताए। अखिलभित्र ३२ को उमेर हद लागे उनी बाहिरिनुपर्छ।
'यसबीचमा संगठनको महाधिवेशन नियमित हुन सकेन। नियमित महाधिवेशन भएको भए ३०–३२ वर्षभित्रै नेतृत्वमा पुग्ने अवस्था बन्थ्यो। पाँच–छ वर्ष महाधिवेशन रोकिँदा म ३७ वर्षको भएँ,' उनले भने, 'तथापि संगठनको नेता बन्ने उमेरले होइन, क्रियाशीलताले हो। प्रतिस्पर्धा र पहलकदमीले हो। प्रतिस्पर्धाबाटै श्रेष्ठता हासिल गर्ने हाम्रो नीति पनि हो।'
उनले अखिलको नेतृत्व गर्ने व्यक्ति राजनीतिक, वैचारिक र कार्यक्रमका हिसाबले परिपक्व हुनुपर्ने आफ्नो मान्यता रहेको बताए। यद्यपि विधान मस्यौदा समितिले प्रस्ताव तयार पार्ने र महाधिवेशनको हलमा पेस गरिने, हलले गर्ने निर्णय अन्तिम हुने बताए।
शनिबारको सचिवालय बैठकमा एमाले महासचिव शंकर पोखरेल पनि थिए। विद्यार्थी नेताहरूकै निर्णयले स्ववियुमा उमेर हद लागेको प्रसंग कोट्याउँदै अखिलको सन्दर्भमा पनि संगठनको निर्णय पार्टीलाई मान्य हुने बताएका थिए।
एमालेकै जनसंगठन राष्ट्रिय युवा संघ नेपालमा पनि उमेर हदको प्रावधान छ। राष्ट्रिय युवा संघमा ४० वर्ष उमेरको सीमा तोकिएको छ।
नेकपा एमालेको नीतिअनुसार जनसंगठनका पदाधिकारी ९ सदस्यीय मात्रै हुनेछन्। स्थायी कमिटी रहने छैन, जसअनुसार आगामी महाधिवेशनबाट अनेरास्ववियुमा एक अध्यक्ष, महिला सहित दुई उपाध्यक्ष, एक महासचिव, एक उपमहासचिव र चार सचिव राख्न पाइनेछ। चार सचिवको पनि क्लस्टर छुट्टाइएको छ। यसमा विदेश सचिव, संगठन सचिव, प्रचार सचिव, कोष सचिव या कोषाध्यक्षको व्यवस्था गर्न सकिनेछ।
