सूचना तथा सञ्चार प्रविधि मन्त्री गोकुल बाँस्कोटाले नेपाली मिडियाको धोती खुस्केको टिप्पणी गरेका छन्।
रिपोटर्स क्लब नेपालको वार्षिक उत्सवमा सरकारका प्रवक्ता समेत रहेका मन्त्री बाँस्कोटाले पत्रकारलाई प्रश्न गरे,‘रुलिङ पार्टीका नेता पूर्व प्रधानमन्त्री पुष्पकमल दाहालको अमेरिका भ्रमणमा के/के सम्म समाचार छाप्नुभयो? आफ्नो समाचार हेरेर उहाँलाई यहाँ देख्दा लाज लाग्दैन?, उनले थपे, ‘आफ्नो धोती खुस्केको थाहै छैन सरकारमाथि ख्याउँ ख्याउँ। अचम्म लाग्छ बा।’
उनले नेकपाको घोषणापत्रमा सम्पूर्ण नागरिक स्वतन्त्रताका लागि एकताबद्ध हुनुपर्छ भनेर लेखेको उल्लेख गरे।
उनले नेकपामाथि स्वतन्त्रताको प्रश्न उठाइएकोमा विरोध गरे।
‘गज्जब लाग्छ’, बाँस्कोटाले भने, ‘मन परेन भने यो कम्युनिस्ट पार्टीको सरकार मन परेन भनिदिनुहोस्। त्यो हक छ।’
उनले कसले फेसबुकमा प्रतिबन्ध लगाउन लाग्यो भन्दै प्रश्न समेत गरे।
सरकारले नियमन गर्न ल्याउन लागेको विधेयकहरूलाई प्रेस स्वतन्त्रता विरोधी भनिएकोमा असन्तुष्टि व्यक्त गरे। उनले केही व्यक्तिका कारण ‘प्रतिष्ठित र वास्तविक पत्रकार लज्जित’ भएको समेत बताए।
