सेन्चुरी मसलाका मालिक तथा उद्योगपति मोतिलाल दुगडले अब आफ्ना व्यावसायिक गतिविधि खाद्य उद्योगमै केन्द्रित गर्ने बताएका छन्।
यसैका लागि उनले विराटनगरमा निर्माणाधीन आफ्नो होटल सेन्चुरियन र व्यापारिक मल भाटभटेनीका मालिक मीनबहादुर गुरूङलाई बेचेका छन्। दुगडले होटल र मल १ अर्ब ५५ करोड रूपैयाँमा बेचेका हुन्।
दुगडले यो निर्णय गर्नुका पछाडि उत्पादनमूलक व्यवसायमा ध्यान केन्द्रित गर्ने रणनीति रहेको बताए।
सेतोपाटीसँग कुरा गर्दै उनले भने, 'होटल र मल सञ्चालन मेरो मुख्य व्यवसाय होइन। मेरो योग्यता उत्पादनमूलक उद्योगमै छ। त्यसैले मैले यो निर्णय गरेको हुँ।'
दुगड स्पाइसेज एन्ड फुड प्रोडक्ट्स प्रालिले सेन्चुरी ब्रान्डमा मसला, अचार, स्न्याक्स, चाउचाउ, पास्ता लगायत उत्पादन हुँदै आएको छ। यसले नेपालमा मात्र होइन, अस्ट्रेलिया, अमेरिका, जापान, युरोपेली सहित कुल २५ देशमा आफ्ना उत्पादन निर्यात गरिरहेको छ। विदेशी बजारमा यसको माग निरन्तर बढ्दै गएकाले उत्पादन क्षमता दोब्बर पार्ने योजना बनाएको दुगडले बताए।
'हाम्रो निर्यात पहिलो वर्षदेखि नै राम्रो थियो। अस्ट्रेलियामा मात्रै हामीले पहिलो वर्ष एक करोड रूपैयाँको निर्यात गरेका थियौं,' दुगडले भने, 'अहिले हाम्रो वार्षिक निर्यात ६०–७० करोड रूपैयाँको पुगिसक्यो। यसलाई अझ बढाउन हामी मेसिन पनि थप्दै छौं।'
६० करोड रूपैयाँको नयाँ मेसिन आयात गरेको पनि उनले जानकारी दिए। यसले उत्पादन क्षमतामा ठूलो वृद्धि हुने उनको अपेक्षा छ।
खाद्य क्षेत्रमै उद्योग विस्तारका लागि उनले दाल, चामल, तेल, पिठो जस्ता आवश्यक खाद्य पदार्थ पनि सेन्चुरी ब्रान्डमार्फत उत्पादन गर्ने योजना बनाएका छन्।
उनका अनुसार सेन्चुरी ब्रान्डले अहिले वार्षिक दुई अर्ब ५० करोड रूपैयाँको कारोबार गर्छ। दुई वर्षभित्र यो ५ अर्ब रूपैयाँ पुर्याउने लक्ष्य उनले राखेका छन्।
'अहिले सेन्चुरी मसाला र स्न्याक्स धेरै नेपालीको भान्सामा पुगेको छ। अब म यसलाई थप विस्तार गर्न गइरहेको छु,' दुगडले भने।
दुगडले यसअघि विराटनगरमै होटल ह्यारिसन खोलेका छन्। चारतारे यो होटल राम्रै चलिरहेको उनले बताए।
'होटल चलाउने रहर ह्यारिसनबाट पूरा भइसकेको थियो। अर्कातिर सेन्चुरियनको लागत सोचेभन्दा धेरै भयो। अनि मल, सुपरमार्केट मेरो क्षेत्र होइन जस्तो लाग्यो,' उनले भने, 'त्यसैले पनि सेन्चुरियन बेचेँ।'
सेन्चुरियन होटल, मलको अनुमानित लागत ७० करोड रूपैयाँ थियो। सुरूमा ७०–८० कोठाको होटल बनाउने योजना थियो। पछि विस्तार हुँदै डेढ सय कोठाको भयो र मल/सुपरमार्केट थपियो। योसँगै लागत बढ्दै गएर करिब तीन अर्ब रूपैयाँ पुगेको उनले बताए। थप लगानीका निम्ति ऋण लिनुपर्ने भएकाले उनले यो कदम चाल्न नचाहेको पनि बताए।
'मैले पैसा नभएर होइन, ऋण लिएर बनाउन नचाहेकाले यो परियोजना बेचेको हुँ,' उनले भने।
दुगडले सेन्चुरियन होटल बेचे पनि आफूले २० प्रतिशत सेयर कायमै राखेको जानकारी दिए।
होटल बेचेर आएको पैसा सेन्चुरी ब्रान्डकै विस्तारमा लगाउने पनि उनले बताए।
'धेरै मात्रामा प्रिमियम खाद्य उत्पादन निर्यात गर्नेमा केन्द्रित रहन्छु,' ७५ वर्षीय दुगडले भने।
निर्यातमा अहिले उनका छोरा आदित्यले काम गरिरहेका छन्। विदेशमा सेन्चुरीको बजार विस्तार गरी नेपाली उत्पादनलाई विश्वस्तरमा पुर्याउन चाहेको उनले बताए।
'यो सम्भव छ र हामी यसका लागि पूर्ण रूपमा तयार छौं,' उनले भने।
दुगडले खाद्य र होटलबाहेक पाइप, केमिकल, प्लास्टिक उद्योग पनि चलाइरहेका छन्। उनी नेकपा एमालेका केन्द्रीय सदस्य तथा पूर्वराज्यमन्त्री हुन्। उनी तत्कालीन प्रधानमन्त्री केपी शर्मा ओलीका आर्थिक सल्लाहकार पनि थिए।
राजनीतिले आफ्नो व्यवसायमा बाधा नपुर्याएको उनी बताउँछन्।
'म प्रधानमन्त्री ओलीको आर्थिक दृष्टिकोणलाई मन पराउँछु। निजी क्षेत्रलाई प्रश्रय दिने उहाँको नीति राम्रो छ,' उनले भने।
