बलिउड अभिनेत्री कटरीना कैफले अब रनवीर कपुरसँग कुनै फिल्म नखेल्ने बताएकी छन्।
कुनै समय प्रेम सम्बन्धमा रहेको यो जोडी अब नयाँ फिल्ममा सँगै देखिने सम्भावना कम छ।
चाँडै रिलिज हुन लागेको फिल्म ‘जग्गा जासुस’को प्रचारका लागि फेसबुकमा रनवीर र कटरीना लाइभ थिए। सोही लाइभ कार्यक्रममा एक फ्यानको प्रश्नको उत्तरमा कटरीनाले अब रनवीरसँग कुनै फिल्म नखेल्ने बताएकी हुन्।
उनले भनिन् ‘अब हामी कुनै पनि फिल्ममा सँगै देखिनेछैनौं, यो सम्भव पनि छैन।’
कटरीना र रनवीरको जोडीलाई सबैले रुचाएका थिए । उनीहरुले सँगै ‘अजब प्रेम कि गजब कहानी’ र ‘राजनीति’मा काम गरिसकेका छन्। फिल्म बाहिर वास्तविक जीवनमा पनि रोमान्समा डुबेको यो जोडीको अहिले ब्रेकअप भईसकेको छ।
फिल्म ‘जग्गा जासुस’ को उनीहरु छुट्टिनु अगावै सुटिङ सुरू भइसकेको थियो। बीचमै उनीहरुको सम्बन्धमा दरार आएपछि केही समय रोकिएको फिल्मको सुटिङ उनीहरुले पुनः सँगै काम गर्न स्वीकारेपछि पूर्ण भएको थियो। अहिले फिल्मको प्रचारमा दुवै सक्रिय छन्। अनुराग बासुले निर्देशन गरेको ‘जग्गा जासुस’ जुलाई १४ मा रिलीज हुँदैछ।
