नेपाल एयरलाइन्सले गुल्मीको रेसुङ्गा विमानस्थलमा हप्ताको तीन पटक उडान भर्न थालेको छ।
यसअघि जहाज अभावको कारण हप्तामा एक दिन (बिहीबार) मात्रै उडान हुँदै आएकोमा अब तीन दिन सुरू गरिएको रेसुङ्गा विमानस्थलका स्टेशन प्रमुख सुमन थापाले जानकारी गराए।
२०८० वैशाख महिनाबाट यो विमानस्थलमा व्यवसायिक उडान सुरू भएको थियो।
'एक/दुई गर्दै सातामा चार पटकसम्म उडान भइरहेको थियो। जहाजमा समस्या आएपछि हामीले यसअघि साताको एक दिन मात्रै उडान भरेका थियौं। हिजोबाट भने सातामा तीन पटक उडान हुने भएको छ,' प्रमुख थापाले भने।
थापाका अनुसार अब आइतबार, मंगलबार र बिहीबार उडान हुने भएको छ।
अहिले रेसुङ्गाबाट काठमाडौं उडानमा सात हजार तीन सय रूपैयाँ भाडा रहेको छ। त्यस्तै काठमाडौंबाट रेसुङ्गा उडानको क्रममा भने सात हजार पाँच सय रूपैयाँ भाडा छ।
रेसुङ्गा नगरपालिकाका प्रमुख खिलध्वज पन्थीले सातामा तीन दिन उडान पनि अपर्याप्त हुने बताए।
'यात्रुको चाप बढी छ। तर जहाज अभावको कारण हामीले भनेजति उडान हुन सकेको छैन। कम्तीमा पनि सातामा चार वटा उडान भर्नुपर्ने हाम्रो माग छ,' पन्थीले भने।
