हिमालय एयरलाइन्सले आगामी बिहीबार (२३ नोभेम्बर) मा कुनमिङ-पोखरा चार्टर उडान गर्ने भएको छ।
आगामी शनिबार पोखरामा आयोजना हुने दोस्रो अन्तर्राष्ट्रिय माउन्टेन कन्ट्री क्रस (मैत्रीपूर्ण दौड प्रतियोगिता)लाई लक्षित गर्दै एयरलाइन्सले चार्टर उडान गर्न लागेको नेपाल नागरिक उड्डयन प्राधिकरणले जनाएको छ।
प्रतियोगितामा सहभागी हुन हिमालयन एयरलायन्स चार्टर उडान गरी खेलाडी, अफिसियल र अन्य पाहुना गरी एक सय चार जना चिनियाँ पोखरा आउने छन्।
नेपाल पर्यटन बोर्ड, नेपालका लागि चिनियाँ राजदूतावास काठमाडौं, पोखरा महानगरपालिकाको संयुक्त आयोजनामा तथा चीनको युनान माउण्टेनियरिङ एण्ड आउटडोर स्पोर्ट्स एसोसिएसन र होटल एसोसिएसन पोखरा सहआयोजना उक्त प्रतियोगिता आयोजना हुन लागेको हो।
यसअघि असार ८ र ९ गते पोखरामा आयोजित चिनियाँ ड्रागन बोट रेसमा भाग लिन चिनियाँ खेलाडी विमान चार्टर गरी पोखरा आएका थिए ।
