पोखरा अन्तर्राष्ट्रिय विमानस्थलमा काठमाडौंबाट यती एयरलाइन्सले रात्रीकालिन उडान (आइएफआर उडान) सुरू गरेको छ। यो उडान आज (आइतबार) बाट लागु हुने गरी तालिका समेत मिलाएको छ।
पोखरा अन्तर्राष्ट्रिय विमानस्थलमा यस अघि नै रात्री उडानको सुविधा भए पनि यतीले आजबाट लागु हुने गरी रात्री उडान सुरू गर्न लागेको हो।
रात्री उडानका लागि यतीले काठमाडौंबाट साँझ ५:३० बजे उडान नम्बर एनवाइटी ६८३ र पोखरा बाट साँझ ६:२० बजे उडान नम्बर एनवाइटी ६८४ मार्फत तालिका मिलाएको एयरलाइन्सका प्रवक्ता सुदर्शन बर्तौलाले जानकारी दिए।
'हाललाई साँझको लागि एउटा मात्र उडान रहे पनि यात्रुको मागअनुसार हालको समयभन्दा पछाडि उडान संख्या थप हुँदै जानेछ,' उनले भने।
आइएफआर उडान सुरू नहुँदा कहिलेकाँही ढिला हुदाँ साँझका उडान रद्द हुने गरेकोमा अब त्यो समस्या समेत हट्ने उनले बताए।
पोखराका लागि यतीले हाल दैनिक ६ वटा उडान गर्दै आएको छ।
