प्रहरी चौकीमा प्रायः हामी आफ्नो समस्या सुनाउन जान्छौं। चोरी, लुटपाट, हत्या, हिंसा, दुर्व्यवहार, ठगी लगायत यावत घटनाको रिपोर्ट प्रहरीलाई टिपाउँछौं।
तर शुक्रबार हामी भैंसेपाटीको प्रहरी चौकी पुग्दा प्रहरी निरीक्षक शशिधर शर्मा उल्टै हामीसँग गुनासो गर्दै थिए। भदौ २४ गते चौकीमा भएका तोडफोड र लुटपाटबारे बताउँदै थिए।
'प्रदर्शनकारीहरूले हाम्रा तीन वटा भवन, तीन वटा गाडी र चार वटा मोटरसाइकल जलाए। हामीले नियन्त्रणमा लिएका १५–२० वटा मोटरसाइकल पनि जलाए। कति चोरेर लगे,' उनले भने, 'हाम्रा धेरै महत्त्वपूर्ण सामग्री, कम्प्युटरहरू चोरेर लगे। एउटा नेलकटर (नङ काट्ने) धरी चोर्न बाँकी राखेनन्।'
प्रहरी चौकीबाट चोरी भएका दुइटा बन्दुक अहिले फिर्ता आएका छन्। बाँकी चोरी भएका सामग्री सिसिटिभी भिडिओको सहायताले फिर्ता ल्याउने प्रयास भइरहेको उनले बताए।
आन्दोलन क्रममा जेलबाट फरार भएका चोर, डाकाहरूले चौकीमा लुटपाट र आगजनी गरेको प्रहरी निरीक्षक शर्माको ठम्याइ छ।
आन्दोलनमा तोडफोड र आगजनीले क्षति भएका व्यक्तिगत भवन, व्यापारिक स्थल र सरकारी कार्यालय यतिबेला धमाधम पुनर्स्थापना हुँदैछन्। र, यो पुनर्स्थापना काममा सरकारभन्दा अगाडि जेन–जी पुस्ता र स्थानीय नै जागरूक भइरहेका छन्।
भैंसेपाटीको यो चौकी पनि स्थानीय आफै बनाउन गर्न लागिपरेका छन्।
यो चौकी भदौ २६ गतेदेखि त्यहीँको प्रगति युवा क्लबको अग्रसरतामा स्थानीय बासिन्दाहरूले बनाउन थालेका हुन्।
'२४ गते आन्दोलनमा चौकी ध्वस्त भयो। प्रहरीहरू यहाँबाट गइसक्दा हामीलाई उहाँहरू चाहिन्छ भन्ने भइसकेको थियो। त्यसैले २६ गते हामीले उहाँहरूलाई बोलायौं। धारा, बत्ती, पानी लगायत जडान गरेर बस्नयोग्य ठाउँ बनाइदियौं,' क्लबका संयोजक सुमन कुमार महतले भने।
त्यो दिन वरपरका चार वटा वडाका अध्यक्षहरूलाई पनि उनीहरूले बोलाएका थिए। वडा अध्यक्षहरूले पनि चौकी बनाउन २५–२५ हजार रूपैयाँ सहयोग गरे। त्यसपछि क्लबका मानिस र अन्य स्थानीय प्रहरी चौकी बनाउने अभियानमा स्वतस्फूर्त जोडिन आए।
'कसैले नगद दिनुभयो त कसैले बालुवा, सिमेन्ट, टायल, फर्निचर सामान लगायत सहयोग गर्नुभयो,' महतले भने।
स्थानीय सँगसँगै गायक सुशान्त केसीले पनि सहयोग गरेको क्लबका सदस्य प्रवीण थापाले बताए।
'उहाँले दुइटा प्रहरी चौकी बनाउँछु भनेर संकल्प गर्नुभएको रहेछ। पुल्चोक र भैंसेपाटीको चौकी बनाउन सहयोग गर्नुभएको छ,' प्रवीणले भने, 'यहाँको चौकीमा ८ सय स्क्वायर फिट टायल दिनुभएको छ। चौकी बनाउन चाहिने कामदार र एक सेट कम्प्युटर दिनुभएको छ। थप सहयोग गर्ने भन्नुभएको छ।'
क्लबले प्रहरी चौकी बनाउन अहिलेसम्म १८ लाख रूपैयाँ उठाइसकेको छ।
यो चौकीमा प्रशासनिक, आवास र मेस भवन छ। एउटा भवन दसैंसम्म र बाँकी तिहारसम्म बनाइसक्ने उनीहरूको योजना छ।
प्रवीणका अनुसार प्रहरी चौकीको अभाव उनलाई चौकी जलेकै दिनबाट भएको थियो। त्यसैले सकभर छिटो बनाउन अग्रसर भएको उनी बताउँछन्।
'त्यो रात त हामी सुत्नै सकेनौं। प्रहरीले छाडेर गएपछि हामीलाई हाम्रै घर पो प्रदर्शनकारीहरूले जलाइदेलान् भन्ने डर भइरह्यो। त्यति धेरै कैदी फरार भएका थिए। चोरी, लुटपाट पनि होला भन्ने डर भयो,' उनले भने।
आन्दोलनका दिन साँझसम्म चौकीको पहिलो तला मात्र जलेको थियो। प्रदर्शनकारीहरू रातमा फेरि आएर सबै भवन जलाइदिएको उनले बताए।
'हामी बिहानसम्म शान्तिपूर्ण आन्दोलन गर्दै थियौं। एक्कासि विभिन्न ठाउँबाट मानिसहरू भेला भए। हामी मिलेर एक–दुई पटक उनीहरूलाई भगायौं पनि। तर पछि प्रहरी दाइहरू नै आफूलाई असुरक्षा भयो भनेर छाडेर जानुभयो। सुरक्षा निकाय नै यहाँबाट बाहिरिएपछि हामीले पनि केही गर्न सकेनौं,' उनले भने।
प्रहरी निरीक्षक शशिधर शर्माका अनुसार भैंसेपाटीको यो चौकीमा ५४ जना प्रहरी कार्यरत छन्। अहिले उनीहरू सबै काममा फर्किइसकेका छन्।
'स्थानीयहरूले स्वस्फुर्त प्रहरी चौकी बनाइदिँदा खुसी लागेको छ। तर आन्दोलनमा धेरैले ज्यान गुमाए, त्यो निकै दुःखद घटना हो। चौकीको भवन फेरि बन्छ, मान्छेको जीवन चाहेर पनि फिर्ता गर्न सकिँदैन,' उनले भने।
-1758342751.jpg)
-1746009348.jpg)
