सिंहदरबारमा थुप्रै सवारी जलेपछि सरकारी कर्मचारीको दैनिकी फेरिएको छ।
आफूले प्रयोग गर्ने सवारी साधन जलेपछि केही कर्मचारीहरू हिँड्दै कार्यालय आउन थालेका छन्।
केही कर्मचारी राइड सेयरिङ प्रयोग गर्न थालेका छन्। केही सार्वजनिक यातायात र केही लिफ्ट लिएर आउने गरेका छन्।
यसरी कार्यालय जान उनीहरू नियमित समयभन्दा चाँडो घरबाट निस्कनुपर्छ। यसले कर्मचारीहरुको दैनिकी फेरिदिएको छ।
भदौ २४ गतेको प्रदर्शनमा भएको तोडफोड र आगजनीपछि बाध्यता र त्रासका कारण उनीहरूको सवारी साधन प्रयोगको शैली बदलिदियो। कतिपय उपसचिव, सहसचिव तहका कर्मचारीहरू पनि पैदल हिँडेरै सिंहदरबार र घर आउजाउ गर्न थालेको बताउँछन्।
सहरी विकास मन्त्रालय र मन्त्रालयअन्तर्गतका निकायका मात्रै ५५ वटा गाडी पूर्ण रूपमा जलेका छन्। त्यसैगरी, ६५ वटा मोटरसाइकल तथा स्कुटर पनि जलेका छन् भने ९ वटा गाडी तोडफोड भएको छ।
सचिवका लागि एकल गाडी प्रयोग गरिए पनि धेरै सहसचिवको हकमा एउटै गाडीले ल्याउनुपर्ने व्यवस्था छ। केही सहसचिवहरू त आफै पनि हिँडेर मन्त्रालय आउने-जाने गरेका छन्।
'मैले चढ्ने गरेको गाडी पनि जलेको थियो, अहिले म हिँडेर सिंहदरबार जाने गरेको छु' सोमबार साँझ शहरी विकास मन्त्रालयका सहसचिव नारायण प्रसाद मैनालीले भने।
आफू मध्यबानेश्वरमा बस्ने भएकाले अफिस र घर आउजाउ गर्न धेरै गाह्रो नभएको उनले बताए। अहिले तोडफोड भएका गाडी मर्मत गरेर सहसचिवहरूलाई गाडी उपलब्ध गराउने तयारी गरिएको छ।
प्रधानमन्त्री तथा मन्त्रिपरिषद् कार्यालयका सहसचिव यमलाल भुसालले प्रयोग गर्ने गाडी पनि जलेको थियो। उनीसहित अहिले ५-६ जना विभिन्न श्रेणीका कर्मचारी एउटै गाडीमा जाने-आउने गरेका छन्। अर्थ मन्त्रालयका सहसचिव टंक पाण्डे पनि केही समय स्कुटरमा यात्रा गरे। अहिले भने तोडफोड भएको गाडी मर्मत गरेर व्यवस्था गरिएको छ।
योजना आयोगका एक अधिकारीका अनुसार कतिपय कर्मचारीहरू गाडी सुरक्षित रहे पनि हिँडेर वा राइड सेयरिङ प्रयोग गरी अफिस आउने गरेका छन्।
'अहिले धेरै त्रास देखिन्छ। सम्भव हुने हिँडेर आएका छन्,' ती अधिकारीले भने।
नियमानुसार सचिव र सहसचिव तहसम्मका लागि गाडी उपलब्ध गराउने व्यवस्था छ। तर मन्त्रालयभित्र अधिकांश उपसचिव र पहुँच पुग्ने अधिकृत तथा कतिपय नायब सुब्बा तहमा पनि गाडी चढ्ने गरेका हुन्छन्।
भदौ २४ गतेको प्रदर्शनमा धेरै गाडी तोडफोड तथा आगजनी भएपछि अहिले धेरै कर्मचारीलाई समस्या परेको छ। यद्यपि, नियमानुसार गाडीको सेवा उपलब्ध हुने (सहसचिव) सम्मका कर्मचारीको हकमा भने भएका गाडीबाट व्यवस्थापन गरिँदै गरेको सरकारी अधिकारीहरूले बताएका छन्।
-1746009348.jpg)
