अर्थ मन्त्रालयले सहसचिवहरूको जिम्मेवारी हेरफेर गर्दै भन्सार विभाग र आन्तरिक राजस्व विभागका प्रमुखसहित महत्त्वपूर्ण विभाग तथा शाखा प्रमुखहरू सरुवा गरेको छ।
अर्थमन्त्रालयको सहसचिवहरूको सरुवा तथा पदस्थापन निर्णयअनुसार केही उच्च पदस्थ अधिकारीहरूको कार्यक्षेत्र परिवर्तन भएको छ।
अर्थ मन्त्रालय, योजना अनुगमन तथा मूल्याङ्कन महाशाखामा कार्यरत सहसचिव महेश भट्टराईलाई भन्सार विभागको महानिर्देशक पदमा सरुवा गरिएको छ। यसअघि त्रिभुवन अन्तर्राष्ट्रिय विमानस्थल भन्सार कार्यालयमा प्रमुख भन्सार प्रशासकका रूपमा कार्यरत महेश बराललाई वित्तीय संघीयता समन्वय महाशाखामा सरुवा गरिएको छ।
त्यस्तै, भन्सार विभागमा उपमहानिर्देशकका रूपमा कार्यरत यमुना प्रधानलाई महालेखा नियन्त्रक कार्यालयमा सहमहालेखा नियन्त्रकका रूपमा पदस्थापन गरिएको छ।
आन्तरिक राजस्व विभागमा नयाँ नेतृत्व अर्थ मन्त्रालय, प्रशासन महाशाखामा कार्यरत सहसचिव मदन दहाललाई आन्तरिक राजस्व विभागको महानिर्देशक बनाइएको छ। त्यसैगरी, आन्तरिक राजस्व विभागका उपमहानिर्देशक सेवन्तक पोखरेललाई अर्थ मन्त्रालय, वित्तीय क्षेत्र व्यवस्थापन तथा संस्थान समन्वय महाशाखामा सरुवा गरिएको छ।
त्यस्तै, आन्तरिक राजस्व विभागका उपमहानिर्देशक तिर्थराज चिलुवाललाई उपमहानिर्देशककै रूपमा निरन्तरता दिँदै सोही विभागमा पुनः पदस्थापन गरिएको छ।
आन्तरिक राजस्व विभागका उपमहानिर्देशक गोपीकृष्ण कोइरालालाई सार्वजनिक ऋण व्यवस्थापन कार्यालयको कार्यालय प्रमुख बनाइएको छ।
सार्वजनिक ऋण व्यवस्थापन कार्यालयका कार्यालय प्रमुख अमृत लम्साललाई भन्सार विभागको उपमहानिर्देशक पदमा सरुवा गरिएको छ।
अर्थ मन्त्रालय वा अन्तर्गत कार्यरत सूचना प्रविधि विज्ञ श्रीचन्द्र साहलाई आन्तरिक राजस्व विभागमा सरुवा गरिएको छ।
यस अघि गत भदौमा आन्तरिक राजस्व विभाग तथा भन्सार विभागका प्रमुखहरूको सरुवा गरिएको थियो।
६ महिनाकै अवधि पुन सरुवा गरिएको हो।
