गैरआवासीय नेपाली संघ (एनआरएनए)को १६ औं युरोपियन क्षेत्रीय सम्मेलन १४ बुँदे घोषणा पत्र जारी गर्दै सकिएको छ।
युरोपेली मुलुक माल्टामा मार्च २८ देखि ३०मा भएको क्षेत्रीय सम्मेलनमा लगानी, व्यापार, उद्यमशीलता, सुरक्षित र मर्यादित वैदेशिक रोजगार तथा श्रम आप्रवासन, गैरआवासीय नेपाली नागरिकता एवं गोर्खाजका मुद्दा, ज्ञान, सीप र प्रविधि, महिला, युवा तथा दोस्रो पुस्ता, च्यारिटी र मानवीय सहायता, पर्यटन, सांस्कृतिक प्रवर्धन लगायतका विषयमा छलफल भएको एनआएनएले जनाएको छ।
आइतबार राति सम्पन्न सम्मेलन पछि जारी गरिएको घोषणापत्रमा अक्टोबरमा हुने १२ औं अधिवेशनका लागि मेम्बरसिप इनफर्मेसन सिस्टम(एमआइएस) मार्फत सदस्यता प्रक्रिया अगाडि बढाउन सबै एनसिसीहरूलाई अनुरोध गरेको छ।
गैरआवासीय नेपाली संघको विधान २००३ (२०२२ को संशोधन सहित) अनुसार सन् २०२५ साल जुलाई महिनामा एनसीसीको राष्ट्रिय महाधिवेशन सम्पन्न गरी सक्न समेत एनआरएनएले भनेको छ।
एक पटकको नेपाली सँधैको नेपाली भन्ने मुल मन्त्रलाई आत्मसात गर्दै वंशजको नागरिकताकै निरन्तरता अपरिहार्यताबारे अनआरएनएले सरकारको ध्यानाकर्षण गराएको छ।
‘नेपाल सरकारले गैरआवासीय नेपालीका पक्षमा गरेका सम्पूर्ण निर्णय र सहजीकरणको लागि हार्दिक आभार व्यक्त गर्दै संविधानको धारा १४ मा प्रष्ट व्यवस्था भएको सामाजिक, सांस्कृतिक र आर्थिक अधिकार सहितको गैरआवासीय नेपाली नागरिकताको कार्यान्वयनका लागि यथाशक्य छिटो आवश्यक कानूनी प्रबन्ध मिलाइदिन तथा गैरआवासीय नेपाली सम्बन्धी ऐन यथाशक्य छिटो संशोधनसहित कार्यान्वयनमा ल्याउन यो सम्मेलन अनुरोध गर्दछ,’ घोषणपत्रमा भनिएको छ, ‘युरोपमा रहेका युवा र दोस्रो पुस्ताका बालबालिकाको चुनौती र सम्भावनालाई पहिचान गर्दै, हामी उनीहरूको सशक्तिकरणका लागि भाषा, संस्कृति र सामुहिकतालाई नेपालसँग जोड्न विभिन्न कार्यक्रमहरू सञ्चालन तथा कम्तिमा एउटा नेपाली भाषा स्कुल सञ्चालनका लागि पहल गर्न यो सम्मेलन एनसीसीलाई आग्रह गर्दछ।’
युवा तथा महिलाहरूको सामाजिक उद्यमशीलता अभिवृद्धिका लागि आवश्यक सहयोग गर्ने, महिला फोरम र युवाहरूको सक्रियतामा सुरू भएको सीप विकास तालिमलाई निरन्तरता दिने भन्दै गैरआवासीय नेपाली अभियानको हरेक क्षेत्रमा महिला तथा युवाहरूको सहभागिता सुनिश्चित गराउने प्रतिबद्धता समेत जनाइएको छ।
१ हजार नेपाली महिला भएका देशहरुमा एउटा महिला सेल्टर स्थापनाका लागि एनसीसीहरू मार्फत गरिने एनआरएनएको योजना छ।
-1743410259.jpg)
