हरेक तीजमा 'बिच्च बिच्चमा' को नयाँ श्रृंखला ल्याउँदै आएका दुर्गेश थापाले यो श्रृंखलालाई बिट मार्ने भएका छन्।
यो श्रृंखलाका गीतलाई लिएर उनी विवादित समेत बन्दै आएका थिए। केही साताअघि आयोजित एक औपचारिक कार्यक्रममा अबदेखि 'उट्पट्याङ गीत' नगाउने घोषणा गरेका उनले 'बिच्च बिच्चमा ७' पछि यसको श्रृंखलालाई बिट मार्ने योजना रहेको बताए।
'बिच्च बिच्चमा ७' केही दिनमा सार्वजनिक गर्ने तयारी छ। यो गीत राम्रो कन्सेप्टमा आउन लागेको दुर्गेशले बताए।
पाँच वर्षअघि सार्वजनिक 'हामी पनि नाच्नु पर्छ बिच्च बिच्चमा' बोलको गीतले राम्रो चर्चा पाएको थियो। सो गीत फिल्म 'छ माया छपक्कै' को प्रमोशनमा समेत प्रयोग गरिएको थियो।
दुर्गेश यतिबेला तीज विशेष कार्यक्रमका लागि अस्ट्रेलिया पुगेका छन्।
